Նախարարը հայտարարեց․ «Տիկին Պողոսյանը լավագույն հանրային առողջապահության կազմակերպիչ է, ինչպես նաև քաղաքականության մշակման հարցում ունի բարձր պրոֆեսիոնալիզմ», սակայն հաղթող է ճանաչվել կենտրոնի ժամանակավոր պաշտոնակատարը. Անուշ Պողոսյան
Անուշ Պողոսյանը գրում է. « «Վ. Ա. Ֆանարջյանի անվան ուռուցքաբանության ազգային կենտրոն» փակ բաժնետիրական ընկերության մրցույթի մասին։
Այսօր կայացած մրցույթին դիտորդներին նորից չթույլատրեցին մասնակցել մրցույթին, նրանք հետևեցին մրցույթին ZOOM հարթակում։
Չնայած այն հանգամանքին, որ ես` որպես մասնակից, հայտարարեցի, որ դեմ եմ տեսանկարահանմանը և դա իմ իրավունքն է, քանի որ այն ամրագրված չէ կարգում և դիտորդները պետք է ֆիզիկապես գտնվեն մրցույթի դահլիճում, նախարարը, որը հանձնաժողովի նախագահն էր, պնդեց, որ դա իր որոշումն է, որը կարող եմ հետագայում բողոքարկել։ Հանձնաժողովի անդամներից մեկը Սամվել Խարազյանն էր, որը օրեր առաջ գրել էր․ «Բրիտանացի գիտնականները բացահայտել են նոր վիրուսային հիվանդության արագ մուտացվող տեսակ՝ տնօրենացավ կամ նույն ինքը ղեկավարացավ։ Չնայած թվում էր, թե դրա տարածումը կանխվել էր դեռ 2018թ-ի ոչ բռնի թավշյա հեղափոխությունից հետո, բայց արի ու տես, որ այն մուտացվել է եւ ի հայտ եկել նոր շտամներով։ Առողջապահության նախարարությունը ձեռնարկում է իր ողջ գործիքակազմը վիրուսի դեմն առնելու համար, հիմնականում որպես արդյունավետ միջոց են ծառայում հակաճիճվային դեղերը», որի կապակցությամբ ես դիմել էի քաղ-ծառայության էթիկայի հանձնաժողով՝ վարքը քննելու պահանջով։ Իմ այն պահանջին, որ կա շահերի բախում սույն անձի հետ և նա չի կարող լինել հանձնաժողովի անդամ, հանձնաժողովի նախագահն նորից պնդեց, որ դա իր որոշումն է, որը կարող եմ հետագայում բողոքարկել։
Ինչևէ, մրցույթի վերջում նախարարը հայտարարեց․ «Տիկին Պողոսյանը լավագույն հանրային առողջապահության կազմակերպիչ է, ինչպես նաև քաղաքականության մշակման հարցում ունի բարձր պրոֆեսիոնալիզմ», սակայն հաղթող է ճանաչվել կենտրոնի ժամանակավոր պաշտոնակատարը․․․․
Անահիտ Ավանեսյան, Դուք ճիշտ եք, ի՞նչ ՓԲԸ- տնօրեն, ես ընդունում եմ ձեր գնահատականը, որի համար շնորհակալ եմ և կմտածեմ նախարարի պաշտոնի մասին։
Ի դեպ, բողոքարկել եմ արդյունքները որպես անհամաձայնության նշան։
Ի՞նչ պետք է անել այսուհետ։ Պետք է մասնակցել բոլոր պրոցեսներին և արձանագրել խախտումները, հավաքել, դասակարգել, մինչև գա պատասխանատվության ժամանակը․․․
Հ․Գ․ Տիկին նախարար, մյուս մրցույթին մասնակցելու եմ որպես դիտորդ, կարող եք գործից չկտրվեք, նախագահ նշանակեք ձեր տեղակալներին․․․․
Հ․Հ․Գ․ Տիկին նախարար, շատ ավելի հաճելի էր Ձեր նախագահությունը, քան թէ․․․․․»։
Հետևեք մեզ Viber-ում
