Փոփոխություններ Հիփոթեքով բնակարան ձեռք բերելու մասին նախագծում

Այսօր ԱԺ արտահերթ նիստում ֆինանսների փոխնախարար Դավիթ Անանյանը  ներկայացրեց ՀՀ Հարկային օրենսգրքում փոփոխություններ եւ լրացումներ կատարելու մասին փաթեթը: 240 դրույթներում փոփոխություն է առաջարկվում անել, որոնցից բովանդակային փոփոխությունները շուրջ 30-նն են: «Առաջարկում ենք, որ հստակեցվի այն նորմը, որ 2017 թվականի հունվարի 1-ից և 18 թվականի հունվարի 1-ից համապատասխանաբար օտարերկրյա ֆիզիկական անձանց և ՀՀ քաղաքացիների կողմից ստացված այն շահաբաժիններն են ենթակա հարկման, որոնք հանդիսանում են 2017 թվականի հունվարի մեկից և 2018 թվականի հունվարի 1-ից հետո գործունեության արդյունքում շահույթի հաշվին են ստացվել: Բացառում ենք այն մտահագությունը, որ այս օրենսդրական փոփոխության արդյունքում կարող է նախորդ տարիներին կուտակված շահույթը հարկվել»,- հայտարարեց փոխնախարարը: Հարկային օրենսգրքում սահմանված է մի նորմ, որ եթե յուրաքանչյուր տարվա հաջորդող հարկային տարվա մինչև հունիսի 30-ը ընկերության ընդհանուր ժողովի կողմից որոշում չի ընդունվել շահաբաժնի բաշխման վերաբերյալ, ապա հունիսի 30-ի դրությամբ հարկման նպատակով կուտակված շահույթը համարվում է բաշխված՝ իր հարկային հետևանքներով. «Մենք առաջարկում ենք հանել այդ իրավական նորմը, քանի որ մենք՝ որպես կառավարություն, գնահատում ենք, որ այո, հնարավոր է՝ որոշ բաժնետերեր, իրենց եկամուտների օպտիմիզացիայի կամ խնայողության նկատառումներից ելնելով, փորձեն այս կամ այն ճանապարհով կուտակված շահույթը արտահանել Հայաստանից և չհարկման ռիսկ կարող էր առաջանալ: Թերևս դրանով էր պայմանավորված այդ կոշտ գործիքի ներմուծումը հարկային օրենսդրություն»: Նրա հաղորդմամբ՝  փոփոխություններից մեկն այն է, որ Հարկային օրենսգրքի քննարկման ժամանակ հարկային մի շարք արտոնություններ վերացրել էին, հիմա գտնում են, որ սխալ են վարվել: Ներգնա մասնագիտացված տուրիզմի տնտեսվարողներից մտահոգություններ են լսել եւ որոշել ներգնա տուրիզմը ԱԱՀ-ից ազատելու նորմը վերականգնել: Անանյանն ասաց, որ կառավարությունը առայժմ վերականգնում է արտոնությունը՝ 3 տարի հետո այն նորից քննարկելու նպատակադրումով: Պտուղներից եւ հատապտուղներից պատրաստված օղիների ակցիզային հարկի դրույքաչափերը վերանայում են: Պտուղներից եւ հատապտուղներից պատրաստված օղիների արժեքը, ՊԵԿ-ից ստացված տեղեկատվության համաձայն, 1 լիտրը 3.500-4000 դրամի սահմաններում է, երբեմն հասնում է 7000 դրամի: Ակցիզային հարկի գծով լինելու են էական հարկային խնայողություններ: Բազմակի օգտագործման տարաների հարկման հետ կապված խնդիր կա, ԱԱՀ-ով հարկման շրջանակի մեջ չեն մտնում, ստացվում է, որ տարայի հարկումը ԱԱՀ-ից ազատված էր, հիմա առաջարկում են, որ այն դեպքում, երբ տարան վերադարձելի չէ, այդ տարայի օտարման գործարքը միայն ազատվի ԱԱՀ-ից: Մյուս փոփոխությունը, որ ներկայացրեց փոխնախարարը, վերաբերում էր եկամտային հարկի, մասնավորապես, հիփոթեքային վարկերի տոկոսների փոխհատուցմանը: Պաշտոնյայի խոսքով՝ 2014-ին իրականացված փոփոխությունները, որոնք նպատակ ունեին ստեղծել գնողունակ պահանջարկ շինարարության ոլորտում և ստեղծել սոցիալական բաղադրիչ, չեն արդարացրել իրենց: «Մենք ուսումնասիրել ու պարզել ենք, որ սոցիալական բաղադրիչը չի գործել, և պետական բյուջեից եկամտային հարկի փոխհատուցումները առավելապես նպաստել են հանրության գնողունակ զանգվածին լրացուցիչ անշարժ գույք ձեռք բերելու ֆինանսավորմանը», - հայտարարեց փոխնախարարը: