Արցախյան շարժման էջը Բաքուն շարունակում է բաց պահել շինծու դատավարությամբ

Քաղաքական վերլուծաբան Տիգրան Դումիկյանը գրում է․

«Չնայած պաշտոնական Երևանը գնացել է Բաքվի պահանջների գրեթե ամբողջական կատարմանը՝ ճանաչել է Ադրբեջանի սուվերենությունը Արցախի նկատմամբ, ստորագրել է ԵԱՀԿ Մինսկի խմբի գործառույթները դադարեցնելու դիմում-նամակը, փաստն այն է, որ Ադրբեջանի իշխանությունը շարունակում է պատանդ պահել Արցախի նախկին ռազմաքաղաքական ղեկավարությանը և նրանց նկատմամբ Շարժման համատեքստում իրականացնում է շինծու դատավարություն։

Խնդիրն այն չէ, թե ինչ դրդապատճառներով է Ադրբեջանը շարունակում այս գործընթացը՝ որպես Հայաստանի դեմ ճնշման գործի՞ք, թե՞ վրեժխնդրության մղումներից ելնելով քաղաքական հաշվեհարդար է իրականացնում։ Իրողությունն այն է, որ անգամ Ժնևյան կոնվենցիաների, Մարդու իրավունքների եվրոպական կոնվենցիայի և այլ միջազգային պայմանագրերի դրույթների բացահայտ խախտմամբ, Բաքուն հարցն օրակարգում է պահում։ Ուստի գործող իշխանության պատկերացումները, թե Ադրբեջանի պահանջների անվերապահ կատարմամբ կամ այդ երկրի բարձրագույն իշխանությունների կողմից մեր ազգային արժանապատվությունը վիրավորող հայտարարություններն անպատասխան թողնելով՝ «խաղաղության գնացքը» տեղ կհասնի կամ արդեն հասել է, ոչ այլ ինչ են, քան քաղաքական խաբկանք։

Իսկ եթե Արցախյան շարժման էջը դեռ փակված չէ, ապա Բաքվի հետ այս թեմայի շուրջ քննարկումների օրակարգը, անկախ այս փուլում հայկական կողմի «հավաստիացումներից», մնում է բաց…»։