Իրավապաշտպաններն ահազանգում են

«Հոգեկան առողջության պահպանման ազգային կենտրոն»-ի տնօրենի մրցույթը տապալվել է, քանի որ մասնակիցներից ոչ մեկը չի հաղթել։ Միաժամանակ, մրցույթն ավարտվել է լուրջ խախտումներով, ինչի մասին բարձրաձայնում են իրավապաշտպանները։

«Առողջության իրավունք» ՀԿ համահիմնադիր Անուշ Պողոսյանը մրցույթի ընթացքում ահազանգել է, որ դիտորդներին, այդ թվում՝ լրագրողներին, թույլ չեն տվել լիարժեք մասնակցել մրցութային գործընթացին։ Նրա խոսքով՝ նրանց տեղավորել են առանձին սենյակում և առաջարկել մրցույթին հետևել անորակ ու ընդհատվող «Zoom» կապով։ Պողոսյանը նշել է, որ սա «կոպտագույն խախտում է», քանի որ նման ընթացակարգ նախատեսված չէ ՀՀ կառավարության 2022 թվականի N129 որոշմամբ։

Ի պատասխան՝ առողջապահության նախարարի խոսնակ Մարիամ Ծատրյանը նշել է, որ դիտորդների իրավունքը չի սահմանափակվել, և նրանք հնարավորություն են ունեցել առանց ռեժիմի խախտման և՛ տեսնելու, և՛ լսելու գործընթացը։ Խոսնակի խոսքով՝ եթե դիտորդները ունեն որևէ բողոք կամ դժգոհություն մրցույթի ընթացքի հետ կապված, գրավոր կերպով իրենց դիտարկումները ներկայացնեն նախարարություն։

Մրցույթին մասնակցած Վահե Բաբայանը, ով ունի 26 տարվա փորձ հոգեբուժության ոլորտում և նախկինում աշխատել է որպես փոխտնօրեն, չի հավաքել անցողիկ 90 միավորը․ նա ստացել է 86.51։ Բաբայանը նաև նշել է, որ առանց հիվանդանոցի ֆինանսական վիճակին ծանոթ լինելու՝ անհնար է մշակել զարգացման ծրագիր։

Մրցույթում հաղթող չի եղել։ Նույն իրավիճակն էր նաև նախորդ շաբաթ կայացած Մասիսի և Արտաշատի բժշկական կենտրոնների տնօրենների մրցույթներում։