Իտալացի ոստիկանները վռնդել են Ադրբեջանի դեսպանատան աշխատակիցներին

Իտալիայում անցկացվել է Amnesty International-ի համաժողովը «Ադրբեջան. անտեսանելի ճնշում» խորագրով, որի ընթացքում քննարկվել են Ադրբեջանում խոսքի ազատության ճնշումները: Համաժողովն սկսելու պահին սրահ են ներխուժել անհայտ անձինք, որոնք ըստ կազմակերպիչների, դեսպանության աշխատակիցներ են եղել և փորձել են բոյկոտել համաժողովը, սակայն նրանց դուրս են բերել իտալական ոստիկանության աշխատակիցները, ովքեր հերթապահում էին սրահի մուտքի մոտ: Քննարկման ժամանակ նշվել է, որ «իրականությունը լուսաբանելու հնարավորությունն ամբողջությամբ անտեսվում է մամուլում։ Բաքվի իշխանությունների սև ցուցակում են ընդգրկվել տարբեր ազգեր ներկայացնող 532 անուն, նրանց թվում` գրողներ, երաժիշտներ, լրագրողներ, այդ թվում` 20 իտալացի»: Ինչպես ներկայացնում է մամուլի ազատության շուրջ վերլուծություններ ներկայացնող articolo21.org կայքը`ադրբեջանական սև ցուցակում հայտնված բոլոր անձանց մեղքը գործնական նպատակով Լեռնային Ղարաբաղ այցելելն է եղել, որի անկախությունը Ադրբեջանը չի ճանաչում 1992-ից ի վեր: «Ադրբեջանականի մութ կողմերից մյուսը մարդու իրավունքների ամենօրյա խախտումներն են, որոնց մասին ևս Amnesty-ն փաստաթուղթ է հրապարակել: Ոստիկանությունն ամեն օր տանջանքների է ենթարկում ձերբակալված քաղաքացիական ակտիվիստներին: Վախի աճող մթնոլորտի մասին է վկայում նաև Freedom House կազմակերպության զեկույցը: Առնվազն 18 բանտարկյալներ կալանավորվել են միայն խոսքի ազատության իրենց իրավունքը պաշտպանելու համար»,- ասվում է պարբերականի հոդվածում: