Էդգար Ղազարյանին ծեծի ենթարկած անձանց պատիժ նշանակվեց․ Aravot.am
Դատարանն այսօր հրապարակեց հանրային գործիչ, Լեհաստանում ՀՀ նախկին դեսպան Էդգար Ղազարյանի ծեծի գործով վերդիկտը, որով երեք մեղադրյալներն էլ մեղավոր ճանաչվեցին։ Էդգար Ղազարյանի ծեծի գործով մեղադրյալները մեղավոր ճանաչվեցին այն հոդվածով, որով ի սկզբանե ներկայացրել էր մեղադրող դատախազը․ այսինքն` թեթեւ մարմնական վնասվածքներ հասցնելու հոդվածով։ Դիտարկելով մեղմացուցիչ հանգամանքների գործոնը, դատարանը վերջնական դատավճռով պատիժ նշանակեց 80 ժամ հանրային աշխատանքը։
«Այսինքն, մարդիկ ազատ արձակվեցին դատարանի նիստերի դահլիճից, ինչպես որ ազատ են եղել մինչեւ հիմա՝ դատավարության ամբողջ ընթացքում։ Ըստ ամփոփման, ստացվում է՝ բան չի եղել։ Մարդիկ ընդամենը մի ուրիշ մարդու մի հատ թեթեւ մարմնական վնասվածք են պատճառել։ Թե ի՞նչ հանգամանքներում է դա եղել, թեթեւ մարմնական վնասվածքը ինչի՞ են այդպես առանձնակի դաժանությամբ պատճառում՝ գետին ընկած մարդուն ոտքի տակ գցած, գլխին խփելով, ի՞նչ դրդվածություն ունեին, ո՞վ էր պատվիրատուն, եթե մարդուն չեն ճանաչում՝ ինչո՞ւ են այդպես վարվում մարդու հետ․․․ հանգամանքները ոչ նախաքննական մարմինն է ուսումնասիրել, ոչ էլ դատաքննության ընթացքում ուսումնասիրվեցին։ Իմ բոլոր միջնորդությունները, որ փորձեն պատվիրատուին բացահայտել, մերժվել են։ Էդ մարդիկ էլ ասում են՝ մենք մեզ իսկի մեղավոր էլ չենք ճանաչում»,- Aravot.am-ի հետ զրույցում ասաց Էդգար Ղազարյանը՝ հեգնելով, որ այս պատմությունից հետո, ցանկացած ընդդիմադիր գործչի մարդիկ կարող են «առնել ոտքերի տակ, ջարդել ու մնալ ազատության մեջ, մի 80 ժամ աշխատել ու վերջացնել․ դա առանձնապես պատիժ չնախատեսող արարք է»։
Էդգար Ղազարյանը տեղեկացրեց, որ անպայման բողոքարկելու է Ընդհանուր իրավասության դատարանի որոշումը։ Նա կարծում է, որ դատավորի դիրքորոշումն ու որոշումներն էլ են իրավական գնահատականի արժանի․ «Պետք է հասկանալ՝ ի՞նչ հանգամանքներում է կայացվել այդ որոշումը եւ ի՞նչ կապ կարող է ունենալ՝ ընդհանուր սխեմայի մեջ»։
Հիշեցնենք, Էդգար Ղազարյանը ծեծի էր ենթարկվել 2022 թվականի հոկտեմբերի 18-ին՝ իր տան շքամուտքի մոտ, ամիսներ անց ՀՀ քննչական կոմիտեն երեք անձի նկատմամբ քրեական հետապնդում հարուցեց այս գործով: Այս գործով նիստերը, սակայն, մինչ օրս չեն կայանում՝ տարբեր պատճառաբանություններով:
Հետևեք մեզ Viber-ում
