Ողբերգական դեպք՝ Վայոց ձորում. ՀԷՑ-ի Ջերմուկի մասնաճյուղի աշխատակիցը հիվանդանոցում մահացել է

Հունիսի 11-ին ողբերգական դեպք է տեղի ունեցել Վայոց ձորի մարզում։ Ժամը 15:45-ի սահմաններում «Վայոց ձոր» բժշկական կենտրոնից ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Ջերմուկի բաժնում ահազանգ է ստացվել, որ Ջերմուկի շտապօգնության բժիշկների հերթապահ խումբը ծայրահեղ ծանր ախտորոշմամբ իրենց մոտ է տեղափոխել մի քաղաքացու։

Ինչպես հայտնում է ֆոտոլրագրող Գագիկ Շամշյանը, տեղում բժիշկները ոստիկաններին հայտնել են, որ վիրավորն ի վիճակի չէ կատարվածի մասին բացատրություն տալու, քանի որ գտնվում է վիրահատարանում։

Ոստիկանության Ջերմուկի բաժնի ծառայողները պարզել են, որ հիվանդանոց տեղափոխվածը Վայոց ձորի մարզի բնակիչ 47-ամյա Սեդրակ Թ.-ն է, ով աշխատում է «Հայաստանի էլեկտրական ցանցեր» ընկերության Վայքի էլեկտրական ցանցի «Ջերմուկ» մասնաճյուղի մալուխային ցանցի վարպետ և օդային գծերի սպասարկման էլեկտրիկ, ով ժամը 14:15-ի սահմաններում Ջերմուկ քաղաքի Մաշտոցի փողոցում աշխատանքային պարտականությունները կատարելիս՝ էլեկտրասյան վրա աշխատանքներ կատարելու ժամանակ, նշված սյունը կոտրվելու և կողաշրջվելու հետևանքով Սեդրակ Թ.-ն վայր է ընկել:

Ֆոտոլրագրողի տեղեկություններով, հաջորդ օրը՝ հունիսի 12-ին, «Վայոց ձոր» բժշկական կենտրոնում Սեդրակ Թ.-ն գիտակցության չգալով մահացել է։

Դեպքի փաստով Վայոց ձորի մարզային քննչական վարչությունում նախաձեռնվել է քրեական վարույթ։