Իսրայելը արտակարգ դրություն է հայտարարել Իրանի վրա հարվածներից հետո

Իսրայելը արգելել է հավաքները և մարզումները հնարավոր հրթիռային հարձակումների պատճառով։ Իշխանությունները զգուշացնում են վտանգի մասին և կոչ են անում մարդկանց հետևել հրահանգներին, հաղորդում է Times of Іsrael–ը։

Իրանի վրա հարվածների ֆոնին Իսրայելի պաշտպանության ուժերի (IDF) ներքին ռազմաճակատի հրամանատարությունը խիստ անվտանգության միջոցառումներ է ձեռնարկում բնակչության համար։

Այսպիսով, երկրում ժամանակավորապես արգելվել են բոլոր կրթական միջոցառումները, հանրային հավաքները և բիզնեսների մեծ մասի գործունեությունը։ Բացառություն է արվել միայն կարևորագույն ենթակառուցվածքային հաստատությունների համար։

Ներքին ռազմաճակատի հրամանատարության խոսնակ Զվիկա Տեսլերը զգուշացրել է, որ առաջիկա ժամերին երկիրը կարող է ենթարկվել «արևելքից նշանակալի հարձակման»։

Դրանք կարող են լինել «ծանր հրթիռներ», որոնք կարող են հասնել երկրի ցանկացած կետի, ասել է նա Channel 12 լրատվականի եթերում։