Ինչ նպատակ ունի Վրաստանը

Վրաստանի անդամակցությունը Եվրոպական միությանը մնում է վրացական իշխանությունների գլխավոր նպատակը, և այդ ճանապարհին կարևոր քայլ է Թբիլիսիի և Բրյուսելի միջև հարաբերությունները վերագործարկելը։

Այս մասին հայտնում է Sputnik գործակալության վրացական ծառայությունը՝ մեջբերելով Վրաստանի վարչապետ Իրակլի Կոբախիձեի հայտարարությունը։

«Մեր խնդիրը ակնհայտ և պարզ է։ Մեր վերջնական նպատակը Վրաստանի անդամակցությունն է ԵՄ-ին։ Մենք կարծում ենք, որ մինչև 2030 թվականը Վրաստանը հնարավորինս պատրաստ կլինի ԵՄ անդամակցությանը, և, իհարկե, կարևոր է նաև վերագործարկել մեր հարաբերությունները այստեղ»,-ասել է Կոբախիձեն՝ հավելելով, որ վրացական իշխանությունները ջանք չեն խնայի այդ հարցում, և մնացած ամեն ինչ, ըստ Կոբախիձեի, կախված կլինի եվրոպական կառույցների մոտեցումից։

Դեռևս 2024 թվականի նոյեմբերի 28-ին Վրաստանի իշխանությունները հայտարարեցին մինչև 2028 թվականը երկրի ԵՄ-ին անդամակցության բանակցությունների մեկնարկը օրակարգից հանելու որոշման մասին։ Ի պատասխան՝ Արևմուտքը մեղադրում է Վրաստանի իշխանություններին ժողովրդավարությունը հետ մղելու մեջ և կոչ է անում անհապաղ վերադառնալ ԵՄ ուղուն։

Վրաստանն այժմ Եվրամիությանը անդամակցելու թեկնածու երկիր է։ Թբիլիսին այս կարգավիճակը ստացել է 2023 թվականի դեկտեմբերին՝ Ուկրաինայից և Մոլդովայից մեկ տարի անց, ինչը վրացական իշխանությունները անարդար էին անվանել։

Թեկնածուի կարգավիճակ տրամադրելուց բացի, Վրաստանին տրվել է 9 պայման՝ Եվրամիությանը ինտեգրվելու բանակցությունների փուլ անցնելու համար։ Դրանց թվում են՝ բևեռացման հաղթահարումը, օլիգարխիզացիայի վերացումը, ազատ և մրցակցային ընտրությունների ապահովումը և այլն։

ԵՄ-ն սառեցրել է հարաբերությունները Վրաստանի հետ, հրաժարվել բարձր մակարդակի հանդիպումներից, կասեցրել ֆինանսական օգնությունը և երկրի ինտեգրումը միությանը՝ պատճառաբանելով բանակցություններ սկսելու պայմանները չկատարելը: ԵՄ հինգ երկիր, ինչպես նաև Մեծ Բրիտանիան, ԱՄՆ-ն և Ուկրաինան վիզային պատժամիջոցներ են կիրառել Վրաստանի մոտ 200 պետական ​​պաշտոնյաների նկատմամբ: