Մերոնք Մինսկում՝ Պուտին-Խաչատուրով առաջին հանդիպումից հետո

Սերժ Սարգսյանը այսօր աշխատանքային այցով մեկնել է Բելառուս՝ մասնակցելու Մինսկում կայանալիք Հավաքական անվտանգության պայմանագրի կազմակերպության (ՀԱՊԿ) հավաքական անվտանգության խորհրդի նստաշրջանին: Գագաթնաժողովին ընդառաջ՝ այսօր Մինսկում կհանդիպեն ՀԱՊԿ անդամ պետությունների արտաքին գործերի, պաշտպանության նախարարները և ազգային անվտանգության խորհրդի քարտուղարները: Նիստին Հայաստանը կներկայացնեն պաշտպանության նախարար Վիգեն Սարգսյանը, ով Մինսկ է մեկնել նոյեմբերի 27-ին, ինչպես նաև ՀՀ ԱԳ նախարար Էդվարդ Նալբանդյանը, ով կմեկնել է Մինսկ՝ նոյեմբերի 29-ին: Երեկ հայտնի դարձավ, որ հանդիպել են Ռուսաստանի նախագահ Վլադիմիր Պուտինն ու Հավաքական անվտանգության պայմանագրի կազմակերպության գլխավոր քարտուղար Յուրի Խաչատուրովը: Ըստ Կրեմլի պաշտոնական հաղորդագրության՝ որպես ՀԱՊԿ գլխավոր քարտուղար՝ տեղի է ունեցել Խաչատուրովի առաջին հանդիպումը Պուտինի հետ Կրեմլում: Մինսկում այսօր կայանալիք ՀԱՊԿ անդամ պետությունների գագաթնաժողովի նախաշեմին Խաչատուրովն այցելում է կազմակերպության անդամ-պետություններ: Նա ՌԴ ղեկավարին ներկայացրել է նոյեմբերի 30-ին Մինսկում կայանալիք ՀԱՊԿ անվտանգության խորհրդի հերթական նստաշրջանի կազմակերպման ընթացքը, կառույցի աշխատանքների հետ կապված հարցեր: ՀԱՊԿ-ի մամուլի քարտուղար Վլադիմիր Զայնետդինովի տվյալներով՝ Խաչատուրովը Պուտինին կտեղեկացնի Հավաքական անվտանգության խորհրդի նիստի նախապատրաստման ընթացքի, ինչպես նաև կազմակերպության ընթացիկ գործունեության մասին: Նոյեմբերի 27-ին ՀԱՊԿ համապատասխան հանձնաժողովը գլխավոր քարտուղարի տեղակալ Արա Բադալյանի ղեկավարությամբ համաձայնեցրել է հիմնական հարցերը, որոնք կքննարկեն կառույցի անդամ պետությունների ղեկավարները, մինչև 2025թ. ժամանակահատվածի համար ՀԱՊԿ հավաքական անվտանգության ռազմավարության իրացումը, կառույցի պաշտպանական պոտենցիալի վերաբերյալ պետությունների ղեկավարների հայտարարությունները, Հիշեցնենք, որ Խաչատուրովը ՀԱՊԿ գլխավոր քարտուղար է նշանակվել 2017 թ. ապրիլի 14-ին՝ երեք տարի ժամկետով: Բիշքեկում կայացած Հավաքական անվտանգության պայմանագրի կազմակերպության (ՀԱՊԿ) անդամ-երկրների ղեկավարների ոչ պաշտոնական հանդիպմանը ՀՀ նախագահին կից Ազգային անվտանգության խորհրդի քարտուղար Յուրի Խաչատուրովը միաձայն ընտրվեց ՀԱՊԿ գլխավոր քարտուղար: Հայաստանի ներկայացուցչի ընտրությունը ՀԱՊԿ գլխավոր քարտուղարի պաշտոնում նախկինում երկու անգամ հետաձգվեց: Ոչ պաշտոնական աղբյուրների համաձայն, պատճառը՝ Ղազախստանի և Բելառուսի նախագահների դիրքորոշումն էր: Շատերը կանխատեսում էին, որ ՀԱՊԿ-ում գլխավոր քարտուղարի պաշտոնի ստանձնումը «մեծ օգուտ» կլինի Հայաստանի համար՝ հիմնավորմամբ, թե այդ պաշտոնը բարձրացնում է Հայաստանի հեղինակությունը, որ այն ՀԱՊԿ-ի անվտանգության հայեցակարգի, կանոնադրության շրջանակներում թույլ է տալիս ՀԱՊԿ-ի ազդեցությունը մեր անվտանգության համար դարձնել ավելի արդյունավետ: Ամենակարևոր հարցը հետևյալն էր, Խաչատուրովի պաշտոնն ի՞նչ ազդեցություն կարող է ունենալ Ղարաբաղի հարցի լուծման նկատմամբ: Պարզ է, որ ՀԱՊԿ-ում այն չի լուծվելու, բայց ՀԱՊԿ-ից ադեկվատ վերաբերմունք՝ հայ-ադրբեջանական սահմաններում պարբերաբար տեղի ունեցող սադրանքների դեպքում այդպես էլ չհնչեցին: Հայաստանն օրեր առաջ ստորագրել է ԵՄ-ի հետ համաձայնագիր: Այս քայլը ռազմավարական դաշնակից Ռուսաստանի կողմից պաշտոնապես չի քննադատվում, բայց դա տեղի է ունենում ռուսաստանյան հեռուստաալիքների «թոք-շոուների» եթերում, արդեն մի քանի հաղորդումներ եթեր են գնացել: Այս պայմաններում Հայաստանի իշխանությունները մեկնել են Մինսկ՝ մասնակցելու ՀԱՊԿ հավաքական անվտանգության խորհրդի նստաշրջանին: Պուտինն էլ ընդունում է Խաչատուրովին՝ առաջին հայացքից այսօրվա գագաթաժողովի կազմակերպչական հարցերը քննարկելու նպատակով: Կարո՞ղ են Մինսկում տհաճ անակնկալներ մատուցել Հայաստանին... Թերևս՝ ոչ ընդգծված: Իսկ թե ինչ կհետևի Մինսկի հանդիպումներին քարոզչական դաշտում Հայաստանի շուրջ, դա, թերևս, ավելի հետաքրքրական է: Թամար Բագրատունի