Աննա Հակոբյանը «կրթում է»՝ առանց լիցենզիայի
7-րդ գումարման Ազգային ժողովի պատգամավոր Աննա Կոստանյանի գրառումը․
«Հետաքրքիր է իմանալ, արդյոք Աննա Հակոբյանը կրթական ծրագիր իրականացնելու համար ունի «Լիցենզավորման մասին» և «Կրթության մասին» օրենքների պահանջով` կրթության բնագավառում գործող ֆիզիկական և իրավաբանական կազմակերպությունների վրա տարածվող լիցենզիա, ավելին` ընդհանրապես ունի՞ լիցենզավորման իրավունք: Իսկ կրթության որակն ապահովելու համար կրթության վերահսկման մարմինը ստուգե՞լ է այս կնոջ կողմից ողջ Հանրապետությունով մեկ իրականացվող կրթական արշավի բովանդակությունը: Վստահաբար՝ ոչ։ Ստացվում է` ՀՀ կրթության տեսչական մարմինը թերացել է իր աշխատանքում և չի կատարել օրենքով իրեն վերապահված գործառույթները` նպաստելով կրթական ոլորտի նկատմամբ անպատասխանատու վերաբերմունքին և խոչընդոտելով առկա հիմնախնդիրների լուծմանը:
Տեսչական մարմինների մասին ՀՀ օրենքի 6-րդ հոդվածի համաձայն` ՀՀ ԿԳՄՍ կրթության տեսչական մարմինը պարտավոր էր իրականացնել տնտեսավարող սուբյեկտների կողմից ՀՀ օրենքների և այլ իրավական ակտերի պահանջների կատարման նկատմամբ օրենքով սահմանված կարգով վերահսկողությունը, ներառյալ՝ ստուգումների իրականացումը: Նշվածներից ոչ մեկը չի կատարվել: Հետևաբար, տեղեկացած եղեք, որ ՀՀ վարչապետի կնոջ անվան տակ հանդես եկող անձը, ով որպես ֆիզիկական անձ` առանց համապատասխան լիցենզիայի կրթական ծրագիր է իրականացնում, իսկ դուք չեք կասեցնում նրա գործունեությունը`օրենքով ձեզ վերապահված գործիքակազմով, դառնում եք մասնակիցը «Լիցենզավորման մասին» և «Կրթության մասին» օրենքների մի շարք դրույթների խախտման։ Ամենաթողությունն ու ամենատարբեր օրենքների խախտումներն այս երկրում դարձել են ամենասովորական ու բնական բանը:
Ու դուք կհամարձակվեք ասել, թե իրավական պետությու՞ն եք կառուցում ու պահում, որտեղ կրթությունը գերակա՞ է»:
Հետևեք մեզ Viber-ում
