Ինչ է կատարվում «Գրանդ Քենդիում». Պաղպաղակի 9 ապրանքատեսակում շեղումներ են հայտնաբերվել, մանրէներ

Պաղպաղակի արտադրության ոլորտում խայտառակ խախտումներ են բացահայտվում, ընդ որում՝ շեղումներ կան թե հայտնի, թե ոչ հայտնի ընկերությունների արտադրանքում։

ՀՀ սննդամթերքի անվտանգության տեսչական մարմինը հունիսի 3-ին հայտարարեց, որ վերահսկողություն է սկսել պաղպաղակի արտադրություններում՝ պայմանավորված սեզոնի ակտիվացմամբ։

Նմուշառվել և լաբորատոր փորձաքննության են հանձնվել «Թամարա», «Գրանդ Քենդի», «Թամարա և Անի», «Երևան-Կաթ», «Մարտին Սթար», «Արտսվիթ», «Նաիրի Լենդ», «Փինք Բերրի», «Մառնիկ», «Իգիթ», «Աշտարակ Միլկ» ՍՊԸ-ներին, ինչպես նաև անհատ ձեռնարկատերեր Վանուհի Մովսիսյանին, Ազատ Ղազանչյանին, Էդուրադ Կարապետյանին պատկանող արտադրամասերից:

Այս պահին հայտնի են 12 արտադրամասերից վերցված նմուշների հետազոտության արդյունքները, որոնցից 10-ում հայտնաբերվել են խախտումներ։
ՍԱՏՄ-ի հրապարակած տվյալների համաձայն՝ շեղումներ չեն հայտնաբերվել «Թամարա» ՍՊԸ-ի արտադրության «Բրիկետ վանիլային» «СССР վանիլայի էսկիմո» «20 կոպեկ վանիլային» կաթնայուղի փոխարինիչով և «Պլոմբիր վանիլ» «Պլոմբիր կարամել», ինչպես նաեւ «Մարտին Սթար» ՍՊԸ-ի արտադրության «Վաֆլե կոն շոկոլադե», «Վանիլային», «Շոկոլադե», «Սենդվիչ ելակի համով», «Էսկիմո վանիլային շոկոլադապատ», «Բրիկետ շոկոլադային» կաթնային պաղպաղակների նմուշներում։ Մնացած բոլոր արտադրատեսակները չեն համապատասխանել պահանջներին։ Ընդ որում՝ «Գրանդ Քենդի» ՍՊԸ-ի արտադրած պաղպաղակում շեղումներ են հայտնաբերվել 9 ապրանքատեսակում։

««Սենդվիչ» վանիլային պլոմբիր շոկոլադե՝ թխվածքաբլիթով, «Սենդվիչ» շոկոլադե պլոմբիր շոկոլադե՝ թխվածքաբլիթով, «Պլոմբիր վանիլային», «Սեր» պլոմբիր սերուցքով ջնարակապատ, «Պլոմբիր շոկոլադե» կաթնայուղով պաղպաղակների նմուշներն օրենսդրությամբ սահմանված նորմերին չեն համապատասխանել մանրէաբանական ԱՑԽՄ (աղիքային ցուպիկի խմբի մանրէներ), իսկ վերջին նմուշը՝ նաև ՄԱՖԱնՄՔ (մեզոֆիլ աէրոբ ֆակուլտատիվ անաէրոբ մանրէներ) ցուցանիշներով։

Կաթնայուղի փոխարինիչով «Ընտանեկան շոկոլադե», «Ընտանեկան վանիլային», «Էսկիմո շոկոլադե ջնարակապատ», «Էսկիմո վանիլային ջնարակապատ» պաղպաղակները օրենսդրությամբ սահմանված նորմերին չեն համապատասխանել կաթնայուղի զանգվածային մաս և մանրէաբանական ԱՑԽՄ (աղիքային ցուպիկի խմբի մանրէներ), իսկ առաջին 2 նմուշները՝ նաև ՄԱՖԱնՄՔ (մեզոֆիլ աէրոբ ֆակուլտատիվ անաէրոբ մանրէներ) ցուցանիշներով»,- նշված է ՍԱՏՄ-ի հաղորդագրության մեջ։

Նշված արտադրատեսակների արտադրությունը կասեցվել է ու ժամանակ տրվել՝ խախտումները վերացնելու համար։

Նկատենք, որ առայժմ չի հրապարակվել անհատ ձեռնարկատերեր Վանուհի Մովսիսյանի արտադրամասում արտադրված պաղպաղակների հետազոտությունների արդյունքները։ Ավելին, միայն հունիսի 3-ի հաղորդագրության մեջ էր նշվում այս անհատ ձեռնարկատիրոջ անունը, իսկ հունիսի 5-ի եւ 6-ի հաղորդագրություններում նրա մասին արդեն մոռացել են։

pastinfo.am