Բանակցությունների ուժը գալիս է բառի ուժից. Իրանի դեսպան

ԵՊՀ արևելագիտության ֆակուլտետի իրանագիտության ամբիոնում կազմակերպվել է Իրանի Իսլամական Հանրապետության արտգործնախարար Աբբաս Արաղչիի «Բանակցության ուժը» գրքի քննարկումը, որը ոչ միայն ակադեմիական նախաձեռնություն էր, այլ նաև մշակութային առաքելություն՝ միտված հայ-իրանական հարաբերությունների խորացմանը։ Մեկ ամիս առաջ հայերեն թարգմանված այս աշխատությունը ներկայացնում է ժամանակակից դիվանագիտության նրբերանգները՝ իսլամական, արևելյան և համաշխարհային մտածողության համադրությամբ։

ԵՊՀ արևելագիտության ֆակուլտետի դեկան Ռուբեն Մելքոնյանի խոսքով՝ գիրքը անդրադառնում է ոչ միայն Իրանի արտաքին քաղաքականությանը, այլև արևելյան դիվանագիտության առանձնահատկություններին, դրա գործիքակազմին, մշակութային շերտերին ու խորքային մտածողությանը։
Նա նաև ընդգծեց, որ գրքում ուշագրավ է արևելյան և արևմտյան դիվանագիտական մոտեցումների համադրումը։ Ըստ դեկանի՝ «Բանակցության ուժը» գիրքը արձագանքում է ժամանակակից դիվանագիտական խնդիրներին, բայց արևելյան խոհունությամբ և համբերությամբ։

 Իրանագիտության ամբիոնի վարիչ Վարդան Ոսկանյանն էլ նշեց, որ «Բանակցության ուժը» գիրքը ներառում է թե՛ տեսական և թե՛ գործնական գիտելիք. «Այն գրված է արտգործնախարարի տասնամյակների փորձառության հիման վրա՝ ներկայացնելով ոչ միայն բանակցային գործընթացների մեխանիկան, այլև դրանց խորքային քաղաքական ավանդույթը, որը գալիս է հազարամյակների խորքից»։

Վ․ Ոսկանյանը կարևորեց նաև այն հանգամանքը, որ գրքում առկա են բազմաթիվ հղումներ Իրանի դասական գրողներին և սուրբ տեքստերին, մասնավորապես՝ Ղուրանին, ինչը վկայում է դիվանագիտական մտածողության վրա իսլամական և ազգային արժեհամակարգի ազդեցության մասին։

«Մենք մեզ համարում ենք յուրահատուկ կամուրջ մի կողմից՝ արևմտյան, դասական, արևելագիտական ավանդույթների, մյուս կողմից՝ ժամանակակից իրանագիտության և տարածաշրջանային փորձի միջև։ Այս գիրքը հենց այդ երկխոսության կենդանի արտահայտությունն է»,- ընդգծեց Վարդան Ոսկանյանը։
ՀՀ-ում ԻԻՀ արտակարգ և լիազոր դեսպան Մեհդի Սոբհանին շնորհակալություն հայտնեց ԵՊՀ արևելագիտության ֆակուլտետի ղեկավարությանը հյուրընկալելու համար՝ ընդգծելով, որ նման գիտական միջավայրում գրքի ներկայացումը խորացնում է երկխոսության մշակույթը։

Ներկայացնելով գիրքը՝ դեսպանը նշեց․ «Բանակցությունների ուժը գալիս է բառի ուժից։ Ասում են՝ քաղաքակրթությունը սկսվեց այն ժամանակ, երբ մարդիկ սովորեցին միմյանց վրա բառեր նետել՝ քարերի փոխարեն։ Քարերից կարելի է փախչել, բայց բառերից՝ ոչ։ Խոսքը կարող է սպանել և վերակենդանացնել։ Պատմության ընթացքում խոսքերը ավելի շատ են սպանել, քան փամփուշտները»։

Դեսպանը ներկայացրեց գիրքը՝ շեշտելով իրանական բանակցությունների յուրահատուկ մոդելը, որն ընդգրկված է գրքի վերջին գլխում։ Այս մոդելը դեսպանը համեմատեց շուկայական սակարկությունների հետ, որտեղ ամենակարևորը համբերությունն է․ «Այս բանակցություններում, ով շուտ հոգնում է, նա էլ պարտվում է»։