«Մեզ համար անակնկալ էր. Գիտեինք՝ ԿԳՄՍՆ կազմում ինքնուրույն կառույց ենք լինելու, այլ ոչ թե Պատմության թանգարանի մասնաճյուղ». «Մայր Հայաստան» ռազմական պատմության թանգարանի տնօրեն

Կառավարությունը որոշել է Հայաստանի Հանրապետության պաշտպանության նախարարության «Մայր Հայաստան» ռազմական պատմության թանգարան» պետական հիմնարկը միաց­ման ձևով վերակազմակերպել՝ միացնելով «Հայաստանի պատմության թանգարան» պետական ոչ առևտրային կազմակերպությանը։

Որոշման արդյունքում կստեղծվի «Հայաստանի պատմության թանգարան» պետական ոչ առևտրային կազմակերպության «Մայր Հայաստան» ռազմական պատմության թանգարան» մասնաճյուղ: Իսկ «Հաղթանակ» զբոսայգու տարածքում գտնվող հուշարձանը կամ­րաց­վի Կրթության, գիտության, մշակույթի և սպորտի նախարարությանը:

«Մայր Հայաստան» ռազմական պատմության թանգարանի տնօրեն Վալերի Հակոբյանը դեռևս չի կարող որևէ հարցի հստակ պատասխանել, քանի որ շատ տեղեկացված չէ, թե ինչ է լինելու ու ինչպես է լինելու։

«Հասկանալի է, Կառավարության որոշումը կա, բայց այդ գործընթացից այդքան տեղյակ չեմ։ Ճիշտն ասած՝ ամենասկզբից այնպես պետք է լիներ, որ մենք պետք է առանձին ու ինքնուրույն կառույց լինեինք, բայց ոչ Պաշտպանության նախարարության, այլ ԿԳՄՍ նախարարության կազմում։ Հիմա վերջին պահին փոխել են ու մեզ մասնաճյուղի կարգավիճակ են տալիս՝ Հայաստանի պատմության թանգարանի կազմում։ Սա կոնկրետ մեզ համար անակնկալ էր, այս մասին չգիտեի»,- 168.am-ի հետ զրույցում նշեց Վալերի Հակոբյանը։

Տնօրենի կարծիքով՝ լավ կլիներ, եթե թանգարանը ԿԳՄՍ նախարարության ենթակայության տակ լիներ՝ որպես առանձին միավոր։

«Մեր թանգարանն այս պահին բոլորի համար անվճար է, այդ դեպքում կկարողանայինք ֆինանսներ ունենալ ու հոգ տանել մեր ֆոնդերի մասին, ցուցադրություններն ավելի լավ կազմակերպել, քանի որ բավականին մեծ նյութեր ունենք Երկրորդ աշխարհամարտի, Արցախյան պատերազմի, Առաջին Հանրապետության վերաբերյալ։

Իսկ վատն այն է, որ եթե մենք ռազմական պատմության թանգարան ենք, բնականաբար, ուսումնասիրության օբյեկտը նաև զինված ուժերն է, և մենք դուրս կմնանք այս ուսումնասիրություններից։ Կրկնում եմ՝ եթե առանձին միավորում լիներ, ապա լավ կլիներ»,- հավելեց մեր զրուցակիցը։

Հարցին՝ միավորման արդյունքում ի՞նչ են անելու աշխատակիցները և անձամբ տնօրենը, մեր զրուցակիցը պատասխանեց՝ գործառույթների առումով նույնպես ոչինչ ասել չի կարող, տեղյակ չէ։

«ՀՀ-ում մեր թանգարանը ռազմական բնույթի միակ թանգարանն է։ Ինչպես հասկացա, դեռ հանրային քննարկում կարող է լինել, աշխատողները հիմա էլ են անորոշության մեջ, երևի 1-2 ամսվա ընթացքում ամեն ինչ պարզ կլինի»,- ընդգծեց մեր զրուցակիցը։

Հիշեցնենք, որ թանգարանում ներկայացված են պատմության 2 դրվագներ՝ հայ ժողովրդի մասնակցությունը 2-րդ համաշխարհային պատերազմին և Արցախյան ազատագրական պատերազմը։

«Մայր Հայաստան» հուշահամալիրը բացվել է 1950 թվականի նոյեմբերի 29-ին, ճարտարապետը Ռաֆայել Իսրայելյանն է։ Այն նախագծվել է հայկական եկեղեցու կառուցվածքով, բարձրությունը 51 մետր է։ 1970 թվականին բացվել է «Սովետական Հայաստանը Հայրենական Մեծ պատերազմում 1941-1945 թվականներին» թանգարանը, որը 1995 թվականին անվանափոխվեց «Մայր Հայաստան» զինվորական թանգարանի և ՀՀ Պաշտպանության նախարարության ենթակայության ներքո։ Այս թանգարանում Բացվել են Արցախին և ինքնապաշտպանական մարտերին նվիրված ցուցասրահներ։

168.am