Ավելի քան 105 մլն դրամ եկամուտ՝ նախորդ տարվա 3 մլն 250 հազար դրամի փոխարեն. ինչ է հայտարարագրել Աննա Հակոբյանը

Վարչապետ Նիկոլ Փաշինյանի կինը՝ Աննա Հակոբյանը, ներկայացրել է 2024 թվականի հայտարարագիրը։

Նախորդ տարեսկզբին հայտարարագրած երկու բնակարաններից մեկը՝ Շենգավիթ վարչական շրջանում գտնվողը, Հակոբյանը օտարել է 45 մլն 500 հազար դրամով։ Պարզվում է՝ նա եղել է այդ բնակարանի միանձնյա սեփականատերը և ձեռք է բերել այն 2005 թվականին։ Ընդհանրապես, համատեղ ամուսնության ընթացքում ձեռք բերված գույքի նկատմամբ ամուսիններն ունեն բաժնեմասի իրավունք։

Ինչևէ, ըստ հայտարարագրի՝ երկրորդ բնակարանը, որը բաժնային սեփականություն է, Հակոբյանը ժառանգություն է ստացել 2006 թվականին։

Փաշինյանի կինը հայտարարագրել է երեք տրանսպորտային միջոց՝ 2008 թվականի արտադրության Nissan, որը գնել է 2010-ին, ինչպես նաև 2006 թվականին ձեռք բերած Renault և 2004 թվականի արտադրության VAZ մեքենաները։

2024 թվականին Հակոբյանը, Նիկոլ Փաշինյանի հետ միասին, փոխառություն է տրամադրել «Իջևանատուն» ՓԲԸ-ին և «Ար ընդ Ար» ՍՊԸ-ին։ Փոխառության ընդհանուր գումարը կազմել է 49 մլն 350 հազար դրամ՝ տրամադրված առանց տոկոսադրույքի։

Տարեվերջին Հակոբյանը հայտարարագրել է երկու ավանդային հաշիվ, որոնք տարեսկզբին չկային։ Դրանցից մեկի ծավալը կազմել է 40 հազար դոլար, իսկ մյուսինը՝ 10 մլն դրամ։

Հատկանշական է, որ եթե տարեսկզբին ինչպես նրա բանկային հաշվին էր 0 դրամ, այնպես էլ կանխիկ գումար չէր հայտարարագրել, ապա տարեվերջին որպես դրամական միջոց հայտարարագրել է բանկային հաշվի մնացորդ՝ 3 մլն 622 հազար դրամ, կանխիկ՝ 8,500 ԱՄՆ դոլար և 650 հազար դրամ։

2024 թվականին Հակոբյանի ընդհանուր եկամուտը կազմել է 105 մլն 876 հազար դրամ, որից՝

44 մլն 415 հազար դրամը՝ «Ամերիաբանկ» ՓԲԸ-ից ստացած վարկ,

45 մլն 500 հազար դրամը՝ գույքի օտարումից (գումարը փոխանցվել է Մարինա Ալբերտի Ռուդսից),

201 հազար 573 դրամը՝ ՀՀ Ֆինանսների նախարարությունից՝ որպես աշխատավարձ,

13 մլն 259 հազար 798 դրամը՝ «Իմ քայլը» հիմնադրամից,

2 մլն 500 հազար դրամը՝ «ԴԱՐԵՍԿԻԶԲ» ընկերությունից։

Նույն տարվա պաշտոնեական հայտարարագրի համաձայն՝ Աննա Հակոբյանն ունեցել է նաև 44 մլն 415 հազար դրամի վարկային պարտավորություն, որը պահպանվել է տարվա ավարտին՝ դեկտեմբերի 31-ի դրությամբ։

Համեմատության համար նշենք, որ 2023 թվականին Հակոբյանի եկամուտը կազմել է ընդամենը 3 մլն 250 հազար դրամ, ինչը եղել է «ԴԱՐԵՍԿԻԶԲ»-ից ստացած աշխատավարձը։

Աղբյուր՝ Փաստինֆո