Չկա լիմոն, մանդարին, դատապարտեմ այսպիսի Նոր տարին. Նիկոլ Փաշինյան

ՀՀ ԱԺ Արտաքին հարաբերությունների մշտական հանձնաժողովը քննարկում էր  Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ՝ «ԵԼՔ»-ի առաջարկած նախագիծը: Այն արժանացավ բացասական եզրակացության: Նախագծին կողմ քվերակեցին հանձնաժողովի անդամներ՝ «Ծառուկյան» խմբակցության պատգամավոր Արարատ Զուրաբյանը եւ «Ելք» խմբակցության պատգամավոր Արտակ Զենլանյանը: ՀՀԿ-ականները դեմ էին: Ամեն դեպքում, նախագիծը բացասական եզրակացությամբ ընդգրկվեց հաջորդ լիագումար նիստի օրակարգ, որի ժամանակ հակիրճ կներկայացվի նախագծի պահանջը: Մինչ քվեարկությունը  «Ելք» խմբակցության ղեկավար Նիկոլ Փաշինյանն անդրադառնալով ԵԱՏՄ-ի պատճառով Վրաստանից ներկրվող մանդարինի քանակի նվազմանը հայտարարեց. «Անկեղծ ասած, երեկվա լրահոսին հետևելով՝ ես հասկացա, որ այս ժամանակները, երևի թե մեր գիտակցության մեջ կվերակենդանանցնեն նաև Խորհրդային միության ասացվածքները։ Դրանից ամենահայտնին և սեզոնայինը հետևյալն է՝ չկա լիմոն, մանդարին, դատապարտեմ այսպիսի Նոր տարին: Նվազել է նաեւ Հայաստանից Ռուսաստան արտահանվող լոլիկը:Երեկ պարզվեց, որ Վրաստանից 5 կգ-ից ավելի մանդարին ներկրելու համար հարկավոր է 4 կգ փաստաթուղթ կցել դրան, և դա ԵԱՏՄ-ի նոր նվաճումն է։ Վրաստանի հետ մենք հիմա ազատ առևտրի համաձայնագիր ունենք և կարող ենք ոչ միայն 5, այլև 6, 7, նույնիսկ 8 կգ մանդարին ներկրել Վրաստանից։ Բայց դրա համար պետք է ֆիտոսանիտարական, միջուկային, քիմիական, կենսաբանական և այլ բազմաթիվ տեղեկանքներ: Այսինքն՝ մարդը 1000 դրամի մանդարին պիտի գնի Սադախլոյից և 5000 դրամ ծախսի, գնա ԹիՖլիս, որ ֆիտոսանիտարական փաստաթուղթ ձեռք բերի, որ կարողանա մանդարին ներկրի: Իհարկե, մենք դեռ խոսում ենք ազատ առեւտրի մասին: Միայն սա չէ, այս տարի Ռուսաստանից Հայաստան են սկսել ներկրել բանջարեղեն: Սա ի՞նչ երեւույթ է, իհարկե կապված է ԵԱՏՄ-ի հետ, բայց այստեղ եւ Ռուսաստանում ջերմոց ունեցողները գազի համար վճարում են երեք անգամ տարբերությամբ, մենք ավելի վճարում ենք երեք անգամ: Մի հատ լոլիկ ունեինք արտահանելու, այն էլ պարզվում է, որ Ռուսաստանից է գալիս»,- նշեց Նիկոլ Փաշինյանը: