ԲԱՑԱՌԻԿ․ Ու՞մ են վստահում ռուսները և ի՞նչ են պայմանավորվել հայերի հետ Կրեմլում․ ՄԱՍ 1
«Հայելի» մամուլի ակումբին մի շարք ուշագրավ մանրամասներ են հայտնի դարձել Կրեմլում Հայաստանի ուղղությամբ քաղաքականության փոփոխության մասին։
Գանք սկզբից։
«Վեդոմոստի» ռուսական թերթը ապրիլի 30-ի ուշ գիշերը, հղում անելով Վլադիմիր Պուտինի աշխատակազմի իր աղբյուրներին, գրել էր, որ Կրեմլում Հայաստանի հետ հարաբերություններն այսուհետ համակարգելու է Ռուսաստանի նախագահի աշխատակազմի ղեկավարի տեղակալ Սերգեյ Կիրիենկոն։ Այդ գործում նա փոխարինել է աշխատակազմում իր գործընկեր Դմիտրի Կոզակին, ով իրեն լավ էր դրսևորել 2014 թվականին Ղրիմի հայտնի իրադարձությունների ժամանակ, և ստացել հետխորհրդային երկրների հետ հարաբերությունները համակարգելու պատասխանատվություն։
Կոզակը, սակայն (ինչպես Պուտինի մամուլի քարտուղար Պեսկովը, արտաքին քաղաքական հարցերով խորհրդական Ուշակովը կամ արտգործնախարար Լավրովը) այսպես կոչված թուրքական լոբբինգի ազդեցության տակ է։ Իսկ Կիրիենկոն առավել անկախ և ազգայնական է համարվում ու հայտնի է լավ կառավարչական հմտություններով, որոնցով աչքի է ընկել ռուսական վերահսկողությանն անցած 4 ուկրաինական շրջաններում արագ տեմպերով պետական ապարատի գործարկումով:
Մեզ հայտնի է դարձել, որ Կիրիենկոն Կոզակին Հայաստանի ուղղությամբ փոխարինել է դեռ չորս ամիս առաջ։ Նա ակտիվորեն ընդգրկվել է գործընթացի մեջ․ ներառել է իր թիմում հայախոս, ազգությամբ ռուս վերլուծաբանների։ Ավելին՝ բազմաթիվ անգամներ հանդիպել է Հայաստանի ընդդիմադիր գործիչների հետ, ներառյալ նրանց, ովքեր ակտիվ դերակատարում են ունեցել Գյումրիում հայկական ուժերի հաղթանակի մեջ։ Հանդիպումներից մեկի ժամանակ ասել է՝ «Ակոբիչ, Հայաստանի ազատագրումը Ռուսաստանի համար պատվի հարց է, էլ չեմ խոսում ռազմավարական նշանակության մասին»։
Ըստ Կիրիենկոյի զրուցակիցներից մեկի, նա շատ լավ է տիրապետում Հայաստանում ներքաղաքական իրավիճակին։ Այդպես՝ Կրեմլում անվերապահորել վստահում են Ռոբերտ Քոչարյանին, համարում են, որ նրա ղեկավարությամբ Հայաստանը կարող է Կովկասում Թուրքիային և Ադրբեջանին զսպող ուժ դառնալ։ Բացառիկ են համարում «Դաշնակցության» դերը, վստահում են Իշխան Սաղաթելյանին։ «Մայր Հայաստան» դաշինքին համարում են ներուժ ունեցող քաղաքական միավոր։ Ակտիվ համագործակցում են Գագիկ Ծառուկյանի հետ։
Շփումներ կան նաև Արթուր Վանեցյանի հետ, որի նկատմամբ, սակայն, վստահությունը առավել քիչ է՝ իր քաղաքական գործընկերների պատճառով։ Այս խնդիրը շտկելու համար են «Հանրապետականի» այցերը Մոսկվա, ինչպես նաև ներքաղաքական օրակարգը «իմպիչմենտի» մասին քննարկումներով կառավարելու ձգտումը։ Պետք է նշել, որ փորձերը ապարդյուն են, քանի որ խնդիրը իրենց ղեկավարի և նրա ընտանիքի անդամի նկատմամբ առկա խորքային անվստահությունն է։
Ուշագրավ է, որ այս ամենի մասին տեղյակ է նաև Նիկոլ Փաշինյանը, ով մոտավոր ակնարկներով կիսվել է միայն երկու երկնագույն Արոների հետ։
Որոշ ժամանակ անց կներկայացնենք հավելյալ տեղեկատվություն այս թեմայի շուրջ։
Հետևեք մեզ Viber-ում
