Փաշինյանը բարոյականություն ունենար, այսօր կայցելեր Սոնա Մնացականյանի գերեզմանին. փաստաբան

Եթե Նիկոլ Փաշինյանը նվազագույն բարոյականություն ունենար, ապա իր հորինած «քաղաքացու օրը» նշելու փոխարեն այսօր կայցելեր իրեն ուղեկցող ավտոշարասյան կողմից երեք տարի առաջ վրաերթի ենթարկված Սոնա Մնացականյանի գերեզմանին, ում հոգեհանգստի ու հուղարկավորության արարողություններին նույնիսկ չի մասնակցել։ Այս մասին իր ֆեյսբուքյան էջում գրել է Սոնա Մնացականյանի իրավահաջորդի ներկայացուցիչ, փաստաբան Րաֆֆի Ասլանյանը գրել է․

«Թե՞ Սոնան քաղաքացի չէր։ Շատերդ կարող եք ասել՝ Նիկոլն ու՜ր, բարոյականությունն ու՜ր, բայց վրաերթի պահին ու դրանից հետո նրա այս անմարդկային սառնասրտությունը ևս մեկ անգամ հիմնավոր կասկած է առաջացնում, որ դեպքի առթիվ նախաձեռնված քրեական վարույթով ողջ քննությունը, այդ թվում՝ կարևոր ապացույցների ոչնչացումը գտնվել է նրա անմիջական ուղղորդման ներքո»,- գրել է փաստաբանը։

Նշենք, որ վրաերթի ողբերգական դեպքից 3 տարի է անցել, գործը մինչեւ հիմա քննվում է դատարանում: Տուժողի իրավահաջորդները եւ նրանց փաստաբանը դժգոհություններ ունեն գործի ընթացքից:

Հիշեցնենք, որ 2022թ.-ի ապրիլի 26-ին՝ ժամը 18:05-ի սահմաններում, Պարոնյան-Լեո փողոցների խաչմերուկում ՀՀ ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատարն իր կողմից վարած «Տոյոտա Պրադո» մակնիշի ավտոմեքենայով վրաերթի է ենթարկել Արարատի մարզի 28-ամյա բնակչուհուն, որի հետեւանքով ստացած մարմնական վնասվածքներով վերջինս տեղափոխվել է «Նաիրի» բժշկական կենտրոն, որտեղ գիտակցության չգալով՝ մահացել է: Նշված ավտոշարասյունն ուղեկցելիս է եղել վարչապետ Նիկոլ Փաշինյանին, իսկ մահացած կինը հղի է եղել։