Տաթեւի ճոպանուղի. լարվածության 11 րոպե. Գերմանական ռադիոյի անդրադարձը

Հայերն իրենց հայրենիքը «քարերի երկիր» են անվանում, այս փոքր պետության մեջ բազմաթիվ ժայռեր, լեռներ եւ կիրճեր կան, Տաթեւում է գտնվում աշխարհի ամենամեծ ճոպանուղին, որի «թռիչքը» 11 րոպե է տեւում: Այս մասին ասված է Deutschlandfunk-ում հրապարակած հոդվածում, որն անդրադարձ է կատարել Տաթեւի ճոպանուղուն։ Ճոպանուղուց մինչեւ Տաթեւի վանք ընկած տարածությունը կազմում է 5,7 կիլոմետր: Դրա անվտանգության եւ տեխնիկական հարցերով պատասխանատուն Հրաչյա Ներսիսյանն է: Նա հարեւան Գորիս քաղաքից է եւ շատ հպարտ է իր աշխատանքով: Նա ասում է. «Նախկինում անգամ չէի կարող երազել, որ այստեղով ճոպանուղի կանցնի: Դրա համար էլ հպարտ եմ, որ մեր շրջանում է գտնվում աշխարհի ամենաերկար ճոպանուղին, եւ ես իմ թիմի հետ միասին պատասխանատու եմ այն բանի համար, որ այն անխափան գործի: Դա մեծ պատիվ է ինձ համար»: Ճոպանուղու կառուցման նախագիծը կոչվում է «Տաթեւի վերածնունդ»: Այն ֆինանսավորվում է հարուստ գործարարների կողմից ստեղծված հիմնադրամի կողմից: Գալիք տարում` իր հիմադրման 1.111-ամյակին, Տաթեւի վանքը պետք է ունենա իր նախկին փայլը եւ զբոսաշրջության միջոցով այստեղ պետք է աշխատատեղեր ստեղծվեն: Մինչեւ ճոպանուղու կառուցումը ընդամենը մի քանի հազար զբոսաշրջիկ էր գալիս այստեղ, իսկ հիմա` տարեկան շուրջ 100.000: Տաթեւի վանքը կառուցվել է իններորդ դարում եւ հանդիսանում է ճարտարապետական հրաշալի մի հուշարձան: Այն բաղկացած է 10-13-րդ դարերում կառուցված երեք եկեղեցիներից` շրջապատված հզոր պաշտպանական պարսպով: Մյուս կողմից Տաթեւը կրկին դարձել է հայ առաքելական եկեղեցու կարեւոր հոգեւոր կենտրոններից մեկը: Դեռեւս միջնադարում այստեղ հռչակավոր համալսարան է եղել: Հայաստանում մարդիկ հպարտ են, որ իրենց փոքր երկիրը աշխարհում առաջինն է քրիստոնեությունն ընդունել որպես պետական կրոն: Այդ պատճառով էլ Տաթեւ են այցելում ոչ միայն զբոսաշրջիկներ, այլ նաեւ` հավատացյալներ ամբողջ Հայաստանից եւ սփյուռքից: Նրանց մի մասն այստեղ մի քանի օր է մնում: Տաթեւի վանքում են գտնվում Պետրոս եւ Պողոս առաքյալների մասունքները: Սարկավագ Հարությունը մշտապես ապրում է վանքում: Հոգեւորականներն ուրախ են, որ ճոպանուղու միջոցով շատ ավելի ճանապարհորդներ են գալիս իրենց մոտ: Վանքի աշխատանքն այնպես է կազմակերպված, որ զբոսաշրջիկներն ու հավատացյալներն իրար չխանգարեն. պատարագները մատուցվում են առավոտյան ժամը 6-ին եւ երեկոյան 19-ին, իսկ ճոպանուղին օրվա ընթացքում գործում է ժամը 10-18-ը: