Իշխանությունը թքած ունի ոչ միայն 1.5 մլն նահատակների, այլև կազմակերպությունների վրա, որոնք ճանաչել են այն

«Ժողովուրդ» օրաթերթը գրում է. «Վարչապետ Նիկոլ Փաշինյանը հակահայ և հակապետական ձևով կասկածի տակ առավ 20-րդ դարի ամենամեծ ջարդի՝ Հայոց ցեղասպանության՝ Եղեռնի, լինելիությունը։

Հունվարի 24-ին Ցյուրիխում հայ համայնքի հետ հանդիպման ժամանակ Փաշինյանը կոչ էր արել ևս մեկ անգամ հասկանալ` ինչ է տեղի ունեցել Հայոց ցեղասպանության ժամանակ, ինչու է դա տեղի ունեցել, և ինչպես է այդ ամենն ընկալվել, ինչու Հայոց ցեղասպանության հարցը 1939 թվականին չի եղել օրակարգում, իսկ 1950 թվականին հայտնվել է։

Սրանք խոսքեր են, որոնցից կարելի է եզրակացնել, որ իշխանությունը` ի դեմս Նիկոլ Փաշինյանի, թքած ունի ոչ միայն հայության, 1.5 մլն նահատակների, այլ նաև այն երկրների, նահանգների և կազմակերպությունների վրա, որոնք ընդունել և ճանաչել են Հայոց ցեղասպանությունը։

Օրինակ` Ուրուգվայը պետականորեն առաջինը պաշտոնապես ճանաչեց Հայոց ցեղասպանությունը 1965 թվականին։

Սկսած 1915 թվականից տարբեր պետություններ ընդունել են բանաձևեր, որոնք դատապարտում են հայերի կոտորածը։

ԱՄՆ-ն երեք անգամ (1916, 1919, 1920) ընդունել է նմանատիպ բանաձևեր, սակայն դրանք չեն կարողացել կանգնեցնել Օսմանյան կայսրության գործողությունները։ 1915 թվականին մայիսի 24-ին Ֆրանսիան, Մեծ Բրիտանիան և Ռուսական կայսրությունը հանդես են եկել համատեղ հռչակագրով, որը նույնպես քննադատում էր այդ կոտորածները։

Պաշտոնապես Հայոց ցեղասպանությունը ճանաչել է 34 երկիր։

Հայոց ցեղասպանությունը ճանաչել են ԱՄՆ 50 նահանգները։ Վերջինն այն ճանաչեց Միսիսիպի նահանգը 2020 թվականին։

Հայոց ցեղասպանությունը ճանաչած պետությունների, կազմակերպությունների, նահանգային և ինքնակառավարման մարմինների ու քաղաքային խորհուրդների համառոտ ցանկը կարող եք տեսնել այստեղ:

Նիկոլ Փաշինյանը Թուրքիայի նախագահի քմահաճույքներն ու տարիների երազանքն է իրականացնում»:

Մանրամասները՝ «Ժողովուրդ» օրաթերթի այսօրվա համարում: