Ասում են թուրքը կկրակի ու գործարանդ կկորի

ԱԺ-ում  2018թ. պետական բյուջեի նախագծի քննարկմանը  ԵԼՔ խմբակցության ղեկավար Նիկոլ Փաշինյանը, Ֆինանսների նախարար Վարդան Արամյանին հարց ուղղելով, նշեց, որ նպաստները, թոշակները, նվազագույն աշխատավարձը չեն ավելանում, սոցիալական, կրթական ու առողջապահական ծախսերը նվազում են, արտաքին պարտքն աճում է. «Դուք հիմա վերցնում եք այնքան պարտք, որքան վերցրել եք ձեր նկարագրած ցնցումային տարիներին: Սրան զուգահեռ գներն աճում են: 2018թ. այդ առումով ամենամեծ գնաճով տարին է լինելու՝ նախորդների համեմատ: Սա նշանակում է, որ աղքատներն ավելի են աղքատանալու: Ի հեճուկս այս ամենի ավելացել են պետական աշխատողների պարգեւավճարները»: Ծանր իրավիճակից դուրս գալու համար միայն նպաստ ու թոշակ չպետք է տանք, այլ պետք է նպաստավոր պայմաններ ստեղծենք,ասաց Արամյանը: «Սահմանի գծի վրա գտնվող գործարանների մասին հիշենք՝ բանկերը ուրիշների համար վարկերը տրամադրում են 10 տոկոսով, նրանց համար՝ 20 տոկոսով, քանի որ ասում են՝ թուրքը կկրակի ու գործարանդ կկորի: Փաստն այն է, որ աղքատության մակարդակը չի հաջողվում կրճատել»,ասաց Փաշինյանը: «Աղքատությունը 29,8 տոկոս է: Ի՞նչն է ազդել դրա վրա, օրինակ՝ տրանսֆերների կտրուկ կրճատումը: Մենք օբյեկտիվ պատճառների հետ պետք է հաշվի նստենք: Աղքատության հաղթահարման լավագույն տարբերակը աշխատատեղ ստեղծելն ու գեներացնելն է»,արձագանքեց Արամյանը: