Բերման է ենթարկվել Արագածոտնի մարզպետի օգնականը

Ոստիկանությունն այսօր հատուկ օպերացիայի միջոցով բերման է ենթարկել Արագածոտնի մարզպետ Սերգեյ Մովսիսյանի օգնականին՝ Ա․ Մարկոսյանին։ Բյուրականից դեպի Աշտարակ գնացող ճանապարհին կանգնեցրել են նրա մեքենան և սկսել են խուզարկել, որից հետո նրա մոտ հայտնաբերվել է 2 տեսակի թմրամիջոց։ Կատարվածից հետո, մարզպետի օգնականն ու մեքենան տարվել են Աշտարակի բաժին։ Այս մասին Euromedia24-ին հայտնել են իրավապահ համակարգին մոտ կանգնած մեր աղբյուրները։ Ըստ տեղեկությունների՝ այս պահին մարզում լարված և տագնապային տրամադրություններ են, անգամ մարզպետարանի աշխատակիցներն են վախենում գնալ ոստիկանություն։

Euromedia24-ը կապ հաստատեց Արագածոտնի մարզպետ Սերգեյ Մովսիսյանի հետ՝ տեղեկության իսկությունը ճշտելու համար, սակայն վերջինս նշեց, որ տեղյակ չէ իր օգնականի հետ կատարվածից․ «Ես տեղյակ չեմ, գուցե նոր է եղել։ Երբ տեղեկանամ իմ գնահատականը կտամ»,- ասաց մարզպետը։

Ոտիկանությունից խոստացան քիչ հետո ճշտել և պարզաբանում տալ։

Նկատենք, որ նմանատիպ դեպք է տեղի ունեցել նաև Գեղարքունիքում, երբ իրավապահները անսպասելի ստուգումներ են սկսել իրականացնել։ Սա նշանակում է, որ Նիկոլ Փաշիյանը նման գործելաոճով սկսել է ստուգել իր թիմակիցներին, քանի որ տեղեկություններունի, որ նրանց շարքերում կան թմրանյութի սիրահարներ, այդ կերպ նա փորձում է մաքրել ՔՊ թիմի շարքերը։