Ինչպես կբաժանեն Սիրիան

Անկարան սիրիական քրդական «Դեմոկրատական միություն» կուսակցության (PYD) մարտական թևին և ջոկատներին (YPG) թույլ չի տա միջանցք բացել Սիրիայի հյուսիսում: TRT պորտալի հաղորդմամբ՝ այս մասին հայտարարել է Թուրքիայի նախագահ Ռեջեփ Թայիփ Էրդողանը: «Հիմա բոլորը մտահոգված են, թե ինչպես կբաժանեն Սիրիան: Մենք նույնպես մտահոգված ենք: Որովհետև կան մարդիկ, որոնք աջակցում են միջանցքի ստեղծմանը Սիրիայի հյուսիսում PYD և YPG կազմակերպությունների կողմից: Ե՛վ մենք, և՛ դուք գիտենք՝ ով է աջակցում այդ ահաբեկչական խմբավորումներին: Թուրքիան ավելի վաղ հայտարարել է, որ հնարավորություն չի տա այդպիսի միջանցք ստեղծել Սիրիայի հյուսիսում և դրա համար կանի իրենից կախված ամեն ինչ»,- ասել է Էրդողանը՝ Աթաթյուրքի անվան օդանավակայանում պատասխանելով լրագրողների հարցերին Կոտ դ’Իվուար մեկնելուց առաջ: