Մի փոքր էմոցիա Ատոմ Ջանջուղազյանից

2018 թվականի բյուջեի նախագծով նախատեսվում է սոցիալական պաշտպանության ոլորտին հատկացնել 408.7 մլրդ դրամ, որը գրեթե նույն մակարդակն է ապահովում, որն այս տարվա բյուջեով էր նախատեսված, այսօր խորհրդարանում հաջորդ տարվա բյուջեի նախագծի քննարկման ժամանակ ասաց ֆինանսների փոխնախարար Ատոմ Ջանջուղազյանը:Բայց, ըստ նրա, ոլորտի ընդհանուր ծախսերի նվազում է լինելու հաջորդ տարի: «Մենք ունենք փոքր ինչ-նվազում սոցիալական պաշտպանության ընդհանուր ծախսերի: Եվ ՀՆԱ-ի մեջ նույնպես սոցիալական ոլորտի հատկացումների նվազում է արձանագրվում»,- ասաց Ջանջուղազյանը:Կենսաթոշակների համար նախագծով նախատեսված է 236 մլրդ դրամ՝ այս տարվա 248 մլրդ դրամի փոխարեն:«Այս բացարձակ թվի նվազումը չպետք է տարակուսանք առաջացնի, որովհետև որևէ փոփոխություն տեղի չի ունեցել այն տեսակետից, որ 2018-ի նախագծով շարունակվում է այն մոտեցումը, որ պետք է ապահովել օրենքով ստանձնած պարտավորությունների կատարումը: Մասնավորապես, դա չի նշանակում, որ օրենքով սահմանված շահառուները չեն ստանալու կենսաթոշակները և չեն ստանալու այն չափով, ինչ օրենքով նախատեսված է»,- ասաց նա:Նպաստների համար հաջորդ տարվա բյուջեով նախատեսվում է հատկացնել 78.6 մլրդ դրամ, գրեթե այնքան, որքան այս տարի: «Ծառուկյան» խմբակցության պատգամավոր Գևորգ Պետրոսյանը ՀՀ ֆինանսների նախարարի տեղակալ Ատոմ Ջանջուղազյանից հետաքրքրվեց, թե ինչպե՞ս է ստացվում, որ մարդկանց վիճակը գնալով վատանում է, բայց կառավարությունն այդ ոլորտի հատկացումները կրճատում է: «Շարունակաբար մենք ականատես ենք լինելու, որ ժողովրդի սոցիալական վիճակը վատթարանում է, եթե կա մեկն այստեղ, որ կարող է հերքել, ես կպնդեմ, որ այդ մարդը ոչ թե Հայաստանում ապրում է, այլ գտնվում է: Ինչպե՞ս է ստացվում, որ սոցիալական վիճակի վատթարացմանը զուգընթաց՝ սոցիալական ոլորտի ծախսերը նվազում են: Արդյոք այս մոտեցումը չի՞ հակասում Սահմանադրությանը՝ համաձայն որի՝ Հայաստանը սոցիալական պետություն է, և Հայաստանում բարձրագույն արժեքը մարդն է»,-հայտարարեց Գ. Պետրոսյանը:   «Այդ մոտեցումը չի հակասում Սահմանադրությանը: Սոցիալական ոլորտի հատկացումներն ընդամենը 0.1 տոկոսով են նվազել:Եթե մենք պատկերացնենք, որ մեր երկրում միայն սոցիալական ծախսերով է մարդկանց սոցիալական վիճակը բարելավվելու, մտավախություն ունեմ, որ մենք դատապարտված կլինենք ձախողման: Սոցիալական բանգավառի ծախսերը, լինելով չափազանց կարևոր, չեն փոխարինում մարդուն աշխատելով իր կենսամակարադկը բարձրացնելու հնարավորություն տվող ծրագրերին: Ասում եք՝ վատացել է, կխնդրեմ ասեք՝ ինչո՞վ: Գործազրկությունն առաջին կիսամյակում 19 տոկոսից դարձել է 17.8 տոկոս՝ այն դեպքում, երբ աճել է ակտիվ բնակչության թիվը: Հիմա այդ մարդկանց համար վիճակը վատացե՞լ է, թե՞ լավացել: Միայն պնդումը, որ վատացել է, իր մեջ ավելի շատ էմոցիա է պարունակում, իսկ թվերը մի քիչ հակառակն են ցույց տալիս»,-ասաց Ջանջուղազյանը: