Երեւանի ձգտումները ԵՏՄ-ում

Հայաստանը, որը Եվրասիական տնտեսական միության մաս է կազմում, ձգտում է Իրանի հետ առեւտրական կապերի ընդլայնմամբ հավասարակշռել իր մասնակցությունը բլոկին, որում Մոսկվան տիրապետող դիրք ունի: Իլան Բերմանն այդ մասին գրում է  The Foreign Affairs պարբերականում հրապարակված հոդվածում: Հեղինակի խոսքով, ինչպես եւ սպասվում էր,  անցյալ տարվա ամռանը պատժամիջոցների վերացումն արդեն տնտեսական խթան է դառնում Իրանի համար: «Համաձայնագիրը  (պաշտոնական անվանումը` Գործողությունների համատեղ համընդգրկուն պլան (Joint Comprehensive Plan of Action) երկիրը կանգնեցրել է ազգային ամուր վերականգնման ուղու վրա: Բայց համաձայնագիրն ավելի մեծ բանի է հանգեցրել: Քանի որ Իրանի տնտեսական հորիզոններն ընդլայնվել են, մեծացել են նաեւ երկրի գլոբալ հավակնությունները», - ասված է հոդվածում: Թեհրանը, որը տարածաշրջանը դիտարկում է որպես միջազգային բեւեռացման դեմ պատնեշ, երկար ժամանակ այսպես կոչված հետխորհրդային տարածքում ավելի մեծ դերի էր ձգտում: «Երկար տարիների ընթացքում Իրանի որպես վտարյալի միջազգային կարգավիճակը եւ Նահանգների ու Եվրոպայի տեսանակյունից սխալ կողմում հայտնվելու` տարածաշրջանի երկրների վախը սահմանափակում էին Իրանի տարածաշրջանային շփումները: Բայց այժմ, միջազգային պատժամիջոցներից ազատվելով, Իրանը թարմ հնարավորություններ է հայտնաբերում», - նշում է հեղինակը: Իլան Բերմանի համոզմամբ, երկիրը տնտեսական տեսանկյունից խորապես ներթափանցում է տարածաշրջանային շուկաներ:  «Որպես գործադրվող ջանքերի մաս, Իրանը վերջին շաբաթների ընթացքում Հարավային Կովկասի բոլոր երեք հանրապետությունների (Հայաստան, Ադրբեջան, Վրաստան) հետ թարմ դիվանագիտական բանակցություններ է սկսել այն էներգետիկ պլանների վերաբերյալ, որոնք Թեհրանին տարածաշրջանային պոտենցիալ խողովակաշարերում առանցքային խաղացող են դարձնում: Այդ բանակցություններն արդեն արդյունք են տալիս:   Իրանը եւ Ադրբեջանը այս ամսվա վերջին տնտեսական համագործակցության նոր համաձայնագրերի ստորագրման ճանապարհին են: Հայաստանը եւս նպատակաուղղված է դեպի Իրանի հետ շփումների ընդլայնում», - նշված է հոդվածում: Այդ տեղաշարժերը, հավելում է հեղինակը, արտացոլում են Հարավային Կովկասում ստեղծվող փոխհամաձայնությունը այն մտքի շուրջ, որ մեկուսացումից դուրս եկած Իրանը կարող է տարածաշրջանի երկրների թոշնած տնտեսությունների համար տնտեսական կենսական զարկերակի վերածվել: