Վիգեն Սարգսյանը՝ ծառայությունից փողով ազատվելու մասին

Հայաստանի Ազգային ժողովում «Պաշտպանության մասին» օրենքի նախագծն առաջին ընթերցմամբ ընդունվեց:  Խորհրդարանը կքննարկի նաև ՊՆ ներկայացրած ևս մեկ օրենքի նախագիծ՝ «Զինվորական ծառայության և զինծառայողի կարգավիճակի մասին»: ԵԼՔ դաշինքի պատգամավոր Մանե Թանդիլյանը նախարարին խնդրեց հայտնել իր տեսակետը վերը նշված հարցի վերբերյալ, որով նախատեսվում է, որ 27 տարին լրացած անձինք կարող են վճարել և չանցնել զինվորական ծառայություն: «Չի կարելի գումարով ազատվել Սահմանադրությամբ սահմանված պարտավորությունից, որովհետև ով փող ունի, վճարում է և ազատվում ծառայությունից,  իսկ սոցիալական խնդիր ունեցողը չի վճարում և ծառայում է առաջնագծում»,- նկատեց նա: Նույն խմբագրությունից պատգամավոր Արարատ Միրզոյանն էլ հարցրեց. «Ավելի վաղ նշել եք, որ ավելի լավ է՝ կոնսենսուսով ընդունվեն այս նախագծերը: Ինձ հետաքրքիր է՝ այդ կոնսենսուսին հասնելու համար որքա՞ն է Ձեր  անձնական դիրքորոշումը փոխզիջումային, որովհետեւ կան դետալներ, որոնց ընդդիմության ներկայացուցիչները դեմ են»: Վիգեն Սարգսյանն էլ՝ պատասխանելով հարցին ասաց.  «Ես չեմ հիշում, որ քննարկումների ժամանակ ձեր հնչեցրած որևէ հարց ներառված չլինի այս նախագծում: Ես բավականին ճկուն եմ քաղաքականություն մշակելիս, չի եղել առաջարկ, որը մանրամասն չի քննարկվել: Քաղաքականությունն այս է՝ պետք է ծառայեն բոլորը՝ բարձրագույն կրթություն ունեցող, գիտական ներուժ ունեցող մարդը կարող է որպես սպա ծառայել, իսկ ով ուզում է շարքային ծառայություն անցնել, կարող  է ծառայել երկու տարի»: