«Հայաստանը հայաթափվում է, ինչը ձեռնտու է Ռուսաստանին». Անուշ Սեդրակյան

Եվրամիություն-Հայաստան Համապարփակ և ընդլայնված գործընկերության փաստաթղթում կան Հայաստանում Ռուսաստանի շահերին հակասող կետեր։ «ՀՀ-ԵՄ վիզային ռեժիմի ազատականացման հարցը մտահոգում է Ռուսաստանին։ Հիմա Հայաստանը հայաթափվում է, ինչը ձեռնտու է Ռուսաստանին. էմիգրացիան դուրս է բերում Հայաստանի առողջ ուժերը»,- Հայելի ակումբում  լրագրողների հետ հանդիպմանը  նման տեսակետ հայտնեց հասարակական գործիչ Անուշ Սեդրակյանը՝ ընդգծելով, որ ԵՄ-ի հետ վիզայի պարզեցված ռեժիմը հնարավորություն կտա շատ մարդկանց՝ Եվրոպայի հետ կապերը պահպանել՝ առանց երկիրը լքելու, լինել գործնականորեն ավելի անկախ, և միևնույն ժամանակ՝ լինել Հայաստանում։ «Դա հիմք է դառնալու քաղաքական և գործարար նոր բազայի ստեղծման համար, որը չի վերահսկվելու ո՛չ ՀՀ իշխանությունների կողմից, ո՛չ էլ ռուսական կենտրոնի կողմից»,- նկատեց նա։ Հետևաբար, ըստ Սեդրակյանի՝ մենք պետք է պարտական լինենք Ուկրաինայի մարդկանց, որոնք Ռուսաստանի հիմնական ուշադրությունը շեղում են իրենց վրա՝ չթողնելով, որ ՌԴ-ն հիմնավորապես զբաղվի Հայաստանով ու Վրաստանով։ «Մերոնք հիմա ապահովագրում են իրենց և ասում են, որ փաստաթուղթը չի կնքվելու, եթե տեխնիկական պատճառներով եվրոպական բյուրոկրատիան ձգձգի։ Այս անգամ ուզում են մեղքը բարդել եվրոպական կողմի վրա։ Բայց մենք հո հասկանում ենք, որ խոսքը գնում է էլեմենտար վախի մասին, որովհետև կարող է Մոսկվայից հնչի նման հրահանգ և դարձյալ այդ պայմանագիրը հետաձգվի»։ Ըստ Անուշ Սեդրակյանի՝ սա Ռուսաստանի կողմից հատուկ արվող  քաղաքականություն է. «Նայեք՝ ինչ են անում. հասցնում են փաստաթղթի ստորագրման մինչև վերջին օրը, հետո կտրուկ արգելում։ Ինչո՞ւ դա չեն անում նախօրոք, մեկ պարզ պատճառով, որ Հայաստանի վարկանիշը միջազգային ատյաններում կտրուկ իջնի, կստացվի, որ դա խոսք չպահող, պայմանավորվածություն չպահող, միջազգային ցածր վարկանիշով մի պետություն է։ Եվ դա բնական է՝ ինչքան քիչ միջազգային վարկանիշ, այնքան մեծ կախում Մոսկվայից»։