«Սև» է եկել գյուղատնտեսության գլխին. Իգնատի Առաքելյանն ամփոփոց տարին

ՀՀ գյուղատնտեսության նախարար Իգնատի Առաքելյանն այսօր ներկայացրեց 2017թ. առաջին 9 ամիսներին ոլորտում իրականացված աշխատանքները: Այսպիսով նա հայտարարեց, որ ոլորտում կան բազմաթիվ խնդիրներ: Նրա խոսքով՝ իրենք վեր են հանել շատ խնդիրներ. «Մենք այսօր գյուղատնտեսությունում ունենք տեխնիկական հագեցածության ցածր մակարդակ: Չունենք մատչելի ֆինանսական միջոցներ, ունենք ոռոգման համակարգի ոչ լիարժեք ապահովվածություն, բնակլիմայական աղետներից կրած վնասներից ապահովված չենք, ունենք շատ թույլ կրթական և խորհրդատվական համակարգեր: Մեր գյուղատնտեսությունն ավանդական է, այնինչ աշխարհում ինտենսիվ գյուղատնտեսությունն է, որը թույլ է տալիս ավելի բարձր եկամտաբերություն ունենալ, որը դեռ Հայաստանում մասշտաբային չէ: Մենք խնդիր ունենք իրացման գների և գյուղացիների վճարումների հետ կապված, որը նորից գյուղատնտեսությունը դարձնում է ոչ հետաքրքիր: Մենք չունենք ճիշտ գնահատական գյուղատնտեսական հողերի օգտագործելիության, ունենք խնդիր օրենսդրական դաշտի բարելավման հետ կապված»: Եվ այսպես Իգնատի Առաքելյանը հերթով թվարկեց գյուղատնտեսական խնդիրներն ու վստահեցրեց, որ կարող են հետագայում ապահովել  բարեկեցիկ կենցաղ: «Խնդիրները լուծելով կստեղծենք հնարավորություն, որ գյուղատնտեսությամբ զբաղվողներն ապահովեն իրենց բարեկեցիկ կենցաղ: Մենք այսօր կառուցում ենք համակարգ, որը թույլ կտա դա ուենալ: Մեր գյուղատնտեսությունն ավանդական է, այնինչ աշխարհում կան շատ բարձրարժեք մշակաբույսեր և ինտենսիվ գյուղատընտեսություն, որը թույլ է տալիս բարձր եկամտաբերություն ունենալ»,-նշեց նախարարը: Նախարարը նկատեց, որ ոռոգման խնդիրն ամենակարևոր խնդիրն է գյուղատնտեսությունում. «Ջրային պետական կոմիտեի հետ համատեղ քարտեզագրվել են այն հնարավորությունները, որոնք կդարձնեն ոռոգման համակարգն ավելի լիարժեք, որոնք թույլ կտան ավելացնել ջրի պաշարները: Ուզում եմ հավաստիացնել, որ Գյուղատնտեսության նախարարությունը և Ջրային պետական կոմիտեն միասին են նախագծում և գնալու են առաջ, որ ոռոգման համակարգը դարձնեն ավելի լիարժեք»: