«Ինչ-որ մի բան»-ը շատ մեղմ է ասված, շատ բան գիտեմ. Աղվան Վարդանյան

«Ուրախ եմ,որ  Ագրամունտը, ի վերջո, չդիմացավ ճնշումներին և հրաժարական տվեց: Ով էլ լինի  ԵԽԽՎ հաջորդ նախագահը, բնականաբար, հետևություններ կանի: Սա մեկ օրվա պատմություն չէ: Ադրբեջանը բավականին լուրջ ճնշումների տակ է:Ինչ կանի Ադրբեջանը, նրա խնդիրն է. դուրս կգա ԵԽԽՎ-ից, թե` ոչ, մեզ ոչ սառն է, ոչ տաք: Մենք այդ կառույցների անդամ ենք, մենք պարտավոր ենք կատարել մեր պարտականությունները: Մենք պետք է կարողանանք մեր պատկերացրած արժեքային համակարգին մոտ լինել: Այս հրաժարականից հետո հետևություններ կանեն եվրոպական տասնյակ ու տասնյակ օրենսդիրներ»,- ԱԺ-ում  լրագրողների հետ զրույցում ասաց  ԱԺ ՀՅԴ խմբակցության քարտուղար Աղվան Վարդանյանը: Լրագրողները նրանից հետաքրքվեցին` 2018 թվականին Սերժ Սարգսյանի` վարչապետ առաջադրվելու մասին: «Միշտ խուսափել եմ «եթե»-ներով հարցերին պատասխանելուց, դա անլուրջ է: Կա օրենսդրություն, կա Հանրապետական կուսակցություն, որին, ըստ մեր համաձայնագրի, պատկանում է վարչապետի թեկնածու առաջադրելու իրավունքը, և երբ այդ իրավունքը կիրացվի, մենք այդ մասին կխոսենք։ Հիմա այդ մասին խոսելը ժամանակավրեպ է», - նշեց Վարդանյանը։ Նա խորհուրդ տվեց համբերատար լինել՝ նշելով, որ կգա ժամանակը, երբ բոլոր հարցերի պատասխանները պարզ կլինեն։ Հարցին, թե արդյո՞ք իրեն այդ մասին ինչ-որ բան հայտնի է, Վարդանյանը պատասխանեց. «Ինչ-որ մի բանը» շատ մեղմ է ասված։ Ես շատ բան գիտեմ»։