Պարոն Բեգոյան, մի փոքր զգույշ խոսեք. Ավինյան (video)

Նոր Նորք վարչական շրջանում ուսումնասիրվել է 50 հա տարածք, որի ուսումնասիրության արդյունքում պարզվել է, որ 5 հա տարածքը տրամադվել է Երևանի կենդանաբանական այգուն՝ իր տարածքների ընդլայնման համար: Առնվազն 36 հա տարածք համարվում է համայնքային սեփականություն և ըստ Երևանի գլխավոր հատակագծի ներառված է կանաչապատման ենթակա տարածքների ցանկում։ Այս մասին այսօրվա Երևանի քաղաքապետարանի գործակարգավարական հերթական խորհրդակցության ընթացքում զեկուցեց «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը։

«Նշված 36 հեկտար տարածքում հայտնաբերվել են մի քանի տասնյակ ինքնակամ կառուցված շինություններ, այդ թվում բնակելի տներ, հասարակական շինություններ, ավտոտնակներ և այլ օժանդակ շինություններ: Համայնքային տարածքի մոտ 7 հեկտար տարածքն ինքնակամ կերպով սահմանազատված, ցանկապատված է, ինքնակամ շինություններով զբաղեցված է այդ տարածքի շուրջ 4 հեկտարը:

Գայի պողոտայի սկզբնամասում 1900 քմ տարածք, ըստ քաղաքի հատակագծի կանաչապատման ենթակա է, բայց անհասկանալի է, թե ինչպես է այդ հատվածը մասնավորեցվել: Դրա շարունակվող մասում, շուրջ 2 հեկտարի վրա առկա են ցանկապատված, փոքր կառուցված տնակներ: Այդ հատվածում ցանկապատված է շուրջ 10 տարածք, որոնցից 4-ում առկա են տնակներ: Այդ 4-ում ապրում են բնակիչներ, դրանցից մեկում ամբողջ ընտանիքով են ապրում և նրանց բնակության հարցը պետք է լուծվի»,- հայտնեց նա:

«Պարո՛ն Բեգոյան, Ձեր այդ հայտարարությունից հետո կպարզվի, որ բոլորում ընտանիքներով դարերով ապրել են։ Մի փոքր զգույշ լինենք այդ հայտարարություններում, որովհետև խոսում ենք ինքնակամ շինությունների մասին, համայնքից զավթված հողերի մասին, խոսում ենք քոլիկների մասին՝ կանաչ տարածքում, որն անընդունելի է: Սոցիալական ծրագրերը հետո կքննարկենք»,- արձագանքեց Երևանի քաղաքապետ Տիգրան Ավաինյանը:

Տիգրան Ավինյանը հանձնարարեց տարածքից մեկ շաբաթվա ընթացքում վերացնել բոլոր «քոլիկները»։