Խուզարկություններ՝ Էկոնոմիկայի նախարարությունում և պաշտոնյաների բնակարաններում
ՀՀ էկոնոմիկայի նախարարությունում խուզարկություններ են իրականացվում։ Նախարարությունից «Փաստինֆո»-ի հետ զրույցում հաստատեցին, որ իրավապահները քննչական գործողություններ են իրականացվում, սակայն այլ մանրամասներ հայտնելուց զերծ մնացին, քանի որ գործողությունները դեռևս չեն ավարտվել։
«Կոռուպցիայի դեմ պայքարը համարում ենք գերկարևոր, բայց պահպանում ենք անմեղության կանխավարկածը»,- ասացին նախարարությունից՝ զերծ մնալով մեկնաբանել պաշտոնից ազատված փոխնախարար Անի Իսպիրյանի և Պետական ներդրումների քաղաքականության վարչության պետ Լիլյա Սիրականյանի ձերբակալման լուրը։
ՀՀ ՔԿ-ից «Փաստինֆո»-ի հետ զրույցում նշեցին, որ վարույթի շրջանակներում ավելի քան 15 վայրերում խուզարկություն է իրականացվում։
«ՀՀ քննչական կոմիտեի Պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում և Հատուկ հանձնարարություններով գլխավոր վարչությունում իրականացվող երկու տարբեր քրեական վարույթներով ՀՀ Քննչական կոմիտեի քննիչների և ՀՀ ազգային անվտանգության ծառայության աշխատակիցների կողմից համատեղ իրականացվում են անհետաձգելի քննչական և այլ դատավարական լայնածավալ գործողություններ, այդ թվում՝ ՀՀ Էկոնոմիկայի նախարարությունում և մի շարք անձանց բնակարաններում՝ ընդհանուր առմամբ ավելի քան 15 վայրերում, կատարվում են խուզարկություններ: Մանրամասների մասին ըստ անհրաժեշտության կտրվի լրացուցիչ տեղեկատվություն»,- հայտնեց ՔԿ մամուլի քարտուղար Գոռ Աբրահամյանը։
Հեղինակ՝ Իզաբել Սահակյան
Հետևեք մեզ Viber-ում
