Դա հաստատ Թուրքիայի կողմից եկած է եղել. Գյուղապետը՝ անգղների մասին

Արմավիրի մարզի Շենավան համայնքի ղեկավար Արթուր Մկրտչյանը, ում լուսանկարները երեկվանից պտտվում են համացանցում, Aysor.am-ի հետ զրույցում ասաց, թե այդ նկարները 2007 թվականի են, նկարում երևացող թռչունին էլ ինքը չի որսացել։ «Ընկերոջս հետ գնում էի Բագարանի, Երվանդաշատի կողմ։ Ճանապարհի եզրին գցած էին թռչունները, էլի մարդիկ, անցորդներ կային, որ նկարվում էին թռչունների հետ։ Մեր մոտ էլ հետաքրքրություն առաջացավ, մենք էլ նկարվեցինք, թողեցինք գնացինք», - ասաց գյուղապետը։ Հիմա էլ, 10 տարի անց այդ լուսանկերները հայտնվել են համացանցում ու հնչեղություն առաջացրել։ Գյուղապետն ասաց, թե ոստիկանությանը և իրեն զանգահարող լրագրողներին բացատրություն պետք է տա, որ ինքը չի եղել թռչուններին որսացողը. «Ես որսորդ եմ և բարեխիղճ որսորդ եմ, ես երբեք ինձ թույլ չէի տա կրակել։ Այդ տարածքում ձմեռվա այդ ժամանակահատվածում որսորդներ շատ կարող էիք հանդիպել, ինչ-որ մեկը երևի կրակել է»։ Դիտարկմանը, թե բարեխիղճ որսորդ լինելով, երբ նկատել է սատկած թռչուններին, որոնք գրանցված են Կարմիր գրքում, չի մտածել իրավապահ մարմիններին դիմելու մասին, գյուղապետն արձագանքեց. «Ճիշտն ասած՝ մտքովս չի անցել։ Այդ ժամանակ, ճիշտ է, գյուղապետ էի, բայց երեխա տղա էի։ Մենակ հետաքրքրություն է եղել։ Չեմ էլ իմացել, որ Կարմիր գրքում գրանցված է եղել։ Դա հաստատ Թուրքիայի կողմից եկած է եղել, որովհետև ես միշտ նայել եմ, դրանք Թուրքիայի սարերում են երևացել։ Այդ տարածքում մենք հաստատ այդ անգղներից չունենք»։