Ո՞վ է նշանակելու Քանաքեռ-Զեյթունի թաղապետին

Պանամայի օֆշորային սկանդալի կիզակետում հայտնված ու այդ պատճառով ԴԱՀԿ պետի պաշտոնից հեռացած գեներալ Միհրան Պողոսյանի հովանավորյալ Քանաքեռ-Զեյթունի թաղապետը` Արտակ Հանիսյանը, պաշտոնանկ է եղել: Ինչպես հայտնի է այս համայնքում այսպես ասած ասողը օֆշորային գեներալն է, ժամանակը ցույց է տվել, որ մշտապես իր «դաբրոյով» են այս համայնքի թաղապետերն ու պատգամավորները աշխատել:  Արտակ Հանիսյանը մինչ թաղապետ աշխատելը ժամանակին Միհրան Պողոսյանի «Քեթրին գրուպի» առաքման բաժնի ղեկավարն էր: Հանիսյանից առաջ թաղապետ էր Գևորգ Ղազարյանը, որը նույնպես Միհրանի տղերքից է: Հետեւաբար այս ազատումը նախեւառաջ պետք է վերագրել Միհրան Պողոսյանին. ինչու ազատեցին կամ ով ազատեց Արտակ Հանիսյանին: Նրա պաշտոնանկության լուրերը շրջանառվում էին վաղուց, երբ Միհրան Պողոսյանը ԴԱՀԿ պետի պաշտոնին հրաժեշտ տվեց: Լուրեր էին պտտվում, որ նրա շրջապատն ամբողջությամբ գահընկեց է արվելու, Հանիսյանին էլ  փոխարինելու է  Տարոն Մարգարյանի մտերիմ Արայիկ Քոթանջյանը՝ նախկին ղեկավաներից: Այդ լուրերը սաստկացան խորհրդարանական ընտրություններից հետո: Ստացվել էր այնպես, որ այս համայնքում միմյանց հետ ռեյտինգային առաջադրումով մրցակցում էին Միհրան Պողոսյանն ու Տարոն Մարգարյանի աներձագ Ռոբերտ Սարգսյանը: Միհրան Պողոսյանն էլ հեռուն գնացող պլաններ ուներ, նա որոշել էր ռեկորդային ձայներ հավաքել եւ հայտ ներկայացնել Երեւանի քաղաքապետի պաշտոնի համար, սակայն ձախողեց: Հանիսյանն էլ բնականաբար անմասն չմնաց Տարոն Մարգարյանի դեմ ձեռնարկած օպերացիայից եւ աշխատեց Պողոսյանի օգտին: Իսկ Երեւանի ավագանու ընտրություններին ջանք չթափեց քաղաքապետի համար: Տարոն Մարգարյանը քաղաքական հաշվեհարդարի չանցավ, սակայն պատեհ առիթը կարծես թե բաց չթողեց: Մի քանի օր առաջ մամուլում հայտնվեց  այս համայնքում գտնվող  157 մանկապարտեզի հետ կապված աղմկոտ պատմությունը:  Քաղաքապետարանը մանկապարտեզում խախտումներ էր հայտնաբերել, որոշել էր ազատել տնօրեն Զարա Ադիյանին, սակայն Հանիսյանը չէր ներկայացնում  նրա ազատման հրամանը, մինչեւ անգամ խոսում էին, թե դիմումը կորել է թաղապետի աշխատասենյակից: Մամուլին հայտնի էր դարձել, որ Միհրան Պողոսյանն էր կարգադրել  դիմումը պատռել ու գցել աղբաման: Նրան այդ խնդրանքով դիմել էր գեներալ Հայկազ Բաղմանյանը, որպեսզի Զարային պահեր մանկապարտեզի վարիչի պաշտոնում: Հիշեցնենք, որ  ընտրությունների ժամանակ Հայկազ Բաղմանյանն իր ողջ նախընտրական ուժերը ներդրել էր Պողոսյանի հաղթանակի եւ Մարգարյանի պարտության գործում: Համայնքում իրեն տեր ու տնօրեն կարգած Պողոսյանին, սակայն, չհաջողվեց կատարել իր մտերիմ ընկերոջ խնդրանքը, ոչ միայն աշխատանքից ազատվեց մանկապարտեզի վարիչը, այլեւ թաղապետ Արտակ Հանիսյանը: Թերեւս ուշագրավ իրավիճակ է ստեղծվել համայնքում, այքսանից հետո Տտարոն Մարգարյանը թաղապետ կնշանակի, իր մարդուն, թե կրկին Միհրան Պողոսյանի: Ամեն դեպքում կան պնդումներ, որ Պողոսյանն ամեն ինչ անում է համայնքը չհանձնելու եւ իր մարդուն թաղապետ դարձնելու համար: Անի Սահակյան