Կասկածո՞ւմ են Սերժ Սարգսյանի անկեղծությանը

Հոկտեմբերի 2-ին Հայաստանի արտգործնախարար Էդվարդ Նալբանդյանի հրավերով Հայաստան կայցելի Եվրոպական հանձնաժողովի հարևանության և ընդլայնման հարցերով հանձնակատար Յոհանես Հանը։ Արտգործնախարարության փոխանցմամբ, ՅոհանեսՀանը հանդիպումներ կունենա նաև Հայաստանի նախագահ Սերժ Սարգսյանի և վարչապետ Կարեն Կարապետյանի հետ։ Հոկտեմբերի 2-ին նախատեսված են Էդվարդ Նալբանդյանի և Յոհանես Հանի բանակցությունները, որոնց արդյունքներով նախարարները հանդես կգան հայտարարություններով։ Փաստացի Յոհանես Հանը Բրյուսելի գագաթաժողովին ընդառաջ է այցելում Երևան։ Գագաթաժողովն անցկացվելու է Բրյուսելում նոյեմբերի 24-ին։ Հանձնակատարը Սերժ Սարգսյանի, վարչապետ Կարեն Կարապետյանի և արտգործնախարար Էդվարդ Նալբանդյանի հետ հանդիպումներում, պարզ է, կքննարկի գագաթաժողովի առաջնահերթությունները և ՀՀ-ԵՄ հարաբերությունների խորացմանն ուղղված հարցեր։ «Սա շատ կարևոր տարի է ԵՄ-Հայաստան հարաբերությունների համար, քանի որ մենք ընդլայնում և խորացնում ենք մեր համագործակցությունը, որը հիմնված է փոխադարձ շահերի վրա։ ԵՄ-ն պատրաստ է ստորագրել Համապարփակ և ընդլայնված գործընկերության համաձայնագիրը Հայաստանի հետ։ Դա՝ Արևելյան գործընկերության առաջնահերթությունների հետ միասին, կձևավորի մեր համագործակցությունը, որտեղ մենք ծրագրում ենք ի թիվս այլ ոլորտների՝ ներդրումներ կատարել կրթության և նորարարության ոլորտներում, քանի որ հմտությունների զարգացումը Հայաստանի զարգացման հիմքն են»,- ասել էր ԵՄ հանձնակատարը՝ հայաստանյան այցից առաջ։ Եվրոպացի պաշտոնյաները, դեսպանները միանշանակ պնդում են, որ «Հայաստանն ու ԵՄ-ն մտնում են նոր փուլ»։ Թե՛ Երևանը, թե՛ Բրյուսելը վստահեցնում են, որ ոչինչ չի խանգարում ստորագրել Հայաստան-ԵՄ համաձայնագիրը, մասնավորապես, վերջերս նման հայտարարություն արեց Սերժ Սարգսյանը։ Յոհանես Հանի այցով Երևան, սակայն, տպավորություն է ստեղծվում, որ այնուամենայնիվ Երևանն ու Բրյուսելը ինչ-որ անորոշության փուլում են, և դեռ ճշգրտումներ են անում։ Մի տեսակ այնպիսի մթնոլորտ է, որ կարծես Բրյուսելը կասկածում է Հայաստանի անկեղծությանը։ Երկու ամիս դեռ կա մինչև բրյուսելյան գագաթնաժողովը, բայց ամեն ինչ կարող է փոխվել, և ո՛չ ՀՀ իշխանությունների, ո՛չ եվրոպացի դիվանագետների հավաստիացումները դեռ ոչինչ չեն նշանակում, որովհետև, բոլորի համար պարզ է, որ վերջին հաշվով, պաշտոնական Երևանը ականջալուր է լինելու Մոսկվայի որոշմանը, իսկ Մոսկվան երկու ամսում կարող է պահանջել Հայաստանից ուղղակի չստորագրել համաձայնագիրը։ Ո՞ւմ համար է գաղտնիք, որ եթե Մոսկվան նման պահանջի՝ Հայաստանի իշխանություններն այդպես էլ կվարվեն։ Այնպես որ, մենք թևակոխում ենք երկամսյա անորոշության մի փուլ։ Թամար Բագրատունի