Ջիհադականները Facebook-ով ամերիկյան զինամթերք են վաճառել

Սիրիայի տարածքում կռվող ջիհադականներն աշխարհի խոշորագույն` Facebook սոցկայքն օգտագործում են որպես «շուկա»` ամերիկյան արտադրության զենք ու զինամթերք գնելու և վաճառելու համար: Գրոհայիններն առցանց տիրույթում վաճառում ու գնում են գրեթե ամեն ինչ` հրթիռների արձակման համակարգերից մինչև հրացաններ: Աղբյուրը մանրամասնում է, որ զենք-զինամթերքի առքուվաճառքի վերաբերյալ բանակցություններն ընթանում են WhatsApp հաղորդագրային հավելվածի միջոցով, գրում է The Foreign Desk-ը։ Նրանց հանցավոր գործունեությունն իրականացվում է The first weapons market in the Idleb countryside կոչվող ֆեյսբուքյան էջի միջոցով: Այնտեղ ներբեռնված են բազմաթիվ զենքերի լուսանկարներ, որոնք, ըստ ջիհադականների, իրենց մատակարարել է ԱՄՆ-ի Կենտրոնական հետախուզական վարչությունը: Բրիտանական The Telegraph պարբերականը նկատում է, որ սրանք այն զենքերն են, որոնցով Միացյալ Նահանգների իշխանությունները զինում էին այսպես կոչված՝ «չափավոր ընդդիմությանը»: Սակայն գրոհայինների զինապահեստում կան նաև խորհրդային արտադրության նմուշներ: Օրինակ` ԱԳՍ-17 նռնականետն այս էջում վաճառվում է 3.800 դոլարով: