Ինքնասպանության միջոցով...

Անցած  2015 թվականին Հայաստանում ինքնասպանությունների աճ է գրանցվել: Թեմայի շուրջ երեկ  հրավիրված ասուլիսին  խոսեցին   ԱԻՆ  ճգնաժամային կառավարման ազգային  կենտրոնի պետ, փրկարար ծառայության գնդապետ Հովհաննես Խանգելդյանը և հոգեբան Սամվել Խուդոյանը: Խանգելդյանը  նշեց, որ անկախ այս ցուցանիշից՝ հարկ է հիշել, որ Հայաստանում ինքնասպանություն գործողների թիվն ավելի քիչ է, քան զարգացած երկրներում: «2015-ին  գրանցվել է ինքնասպանության 195 դեպք: Ինքնասպանություն գործողներից 43-ը իգական սեռի ներկայացուցիչներ են եղել, 152-ը՝ արական: Նշեմ, որ 2015-ին գրանցվել է 557 ինքնասպանության փորձի դեպք: Այս տարի, փառք Աստծո, դեռևս ինքնասպանության դեպքեր չեն գրանցվել» , – ընդգծեց Հովհաննես Խանգելդյանը: Բանախոսի փոխանցմամբ՝  շատերը ինքնասպանության փորձի միջոցով փորձում են ուշադրություն գրավել  հարազատների կամ հանրության ուշադրությունը սևեռել իրենց խնդրի վրա: Դա, այսպես ասած, շանտաժի ձև է: Բայց, ամեն դեպքում, ըստ բանախոսի, հարկ է ուշադրություն դարձնել նաև այս խմբին: Հոգեբան Սամվել Խուդոյանն էլ  իր հերթին նշեց, որ թույլ փիլիսոփայություն ունեցող մարդիկ են ինքնասպանություն գործում: «Ցանկացած սթրես մարդուն կարող է ինքնասպանության դրդել: Բոլորն էլ  ենթարկվում են  խորը դեպրեսիայի, բայց մեկն ինքնասպանություն գործում է, մյուսը՝ ոչ: Ուրեմն պատճառը պետք է փնտրել մարդու ներսում: Դեռահաս տարիքում ինքնասպանությունը կարող է դիտվել որպես ռոմանտիկա: Ինքնասպանություն գործողները խնդիրներն ապրում են, ոչ թե լուծում, իսկ ինքնասպանություն չգործողը խնդիրը լուծում է, հարցը լուծելու ուղիներ է որոնում: Մարդիկ կան, որ հարձակվում են խնդիրների վրա, լուծում դրանք, իսկ ինքնասպանություն գործողները  փախչում են  խնդիրներից»,-ընդգծեց հոգեբանը: Ըստ հոգեբանի՝ նախանշաններ կան, որոնց հետևելով՝ մարդիկ կարող են կանխել  իրենց հարազատների ինքնասպանության դեպքերը: Եթե մեկն ակնարկում է, որ իր կյանքն անիմաստ է,  դա կարող է լինել ինքնասպանության գնալու քայլի նախանշան: «Եթե ինչ-որ մեկի  նախնիների մեջ ինքնասպանություն գործած մարդ կա, պետք է զգույշ լինել, կամ, եթե հարազատները տեսնում են, որ մարդն ինչ-որ գումարներ է հավաքում, հետո գրանցումներ է անում,  եթե նայեն, կտեսնեն, որ թաղման ծախսերն է հավաքում և հենց անհրաժեշտ քանակությամբ գումարը հավաքվում է, տվյալ մարդն ինքնասպանություն է գործում»,-ասաց  հոգեբանը ու հորդորեց ուշադիր ու հոգադար լինել մերձավորների ու սիրելի մարդկանց նկատմամբ: Ա.Ավագյան