Ադրբեջանն ընդդեմ Արցախ այցելած թուրք մտավորականների
Ադրբեջանի գլխավոր դատախազությունը «Ադրբեջանի պետական սահմանը անօրինական կերպով հատելու» մեղադրանքով հետաքննություն է սկսել սեպտեմբերի 22-ին ճանաչողական նպատակով Արցախ այցելած 4 թուրք հասարակական-քաղաքական և մշակութային գործիչների նկատմամբ: «Ադրբեջանի կողմից 4 հայտնի թուրքերին սառը ցնցուղ. կալանավորման որոշում» վերնագրով հրապարակման մեջ «Hurriyet»-ը գրում է, որ Ադրբեջանի դատախազությունը Արցախ այցելած Թուրքիայի Կանաչների և ձախակողմյանների կուսակցության հիմնադիր անդամ, «Անկարայի մտքի հարթակ» հասարակական կազմակերպության ղեկավար, Թուրքիայի 23-րդ գումարման խորհրդարանի պատգամավոր Ուֆուք Ուրասի, գրող, հրապարակախոս Սաիթ Չեթինօղլուի, լրագրողներ Ալի Բայրամօղլուի ու Էրոլ Քաթըրջըօղլուի վերաբերյալ կալանավորման որոշում է կայացրել և միջազգային հետախուզում հայտարարել: Ադրբեջանի Գլխավոր դատախազությունը քրեական գործ է հարուցել Արցախ այցելած Թուրքիայի քաղաքացիների դեմ և այս հարցով դիմել նաև Թուրքիայի կառավարությանը: Վերը նշված հայտարարությունից հետո Թուրքիայի «Ազգային շարժում» կուսակցության պատգամավորներից Աթիլլա Քայան դատապարտել է թուրք մտավորականների այցն Արցախ և անվանել նրանց «ծպտյալ հայեր»: Նշենք, որ այցելությունն Արցախ կազմակերպել էր ԱԺ նախկին պատգամավոր Արագած Ախոյանը:
Հետևեք մեզ Viber-ում
