Սերժ Սարգսյանը պետք է վախենա վրեժխնդրությունից
Ինչ է անելու «Ժառանգությունը» թույլ չտալու Սերժ Սարգսյանի՝ 2018թ.-ի ապրիլից հետո Հանրապետության վարչապետ դառնալուն, օրերս հարցին Րաֆֆի Հովհաննիսյանը լրագրողների հետ հանդիպմանն այսպես պատասխանեց. «Կարծում եմ, որ ամբողջ Հայաստանի ու պարոն Սարգսյանի ընտանիքի, թոռների համար մեծագույն սխալ կլինի, եթե նա այս կամ այն կերպ շարունակի իր մենիշխանությունը: Կարծում եմ՝ առաջին հերթին կտուժեն նրա հաջորդ սերունդները: Իր կուսակցությունը նույնպես պետք է մտածի՝ իրենց հետագիծն ինչպես պետք է ներկայացվի հաջորդ սերունդներին: Եթե ժողովուրդն այդ պահանջարկը ներկայացնի, «Ժառանգությունը» եւ գործընկեր քաղաքական ու քաղաքացիական ուժերը պետք է ամեն ինչ անեն, որ տեղի չունենա այդ մենիշխանության շարունակությունը»: Այս թեմայով զրուցեցինք ընդդիմադիր գործիչ Գուրգեն Եղիազարյանի հետ։ -Պարոն Եղիազարյան, ինչպես կմեկնաբանեք Րաֆֆի Հովհաննիսյանի այս հայտարարությունը, ինչ էր նա ակնարկում։ -Իսկապես, ուշագրավ հայտարարություն էր, եթե մեկ ուրիշը խոսեր, այդքան տարօրինակ չէր հնչի, կարելի էր անգամ ուշադրություն չդարձնել, բայց դրա մասին խոսում է մի մարդ, որը կիսաապստամբ վիճակում գնում է աղոթելու, նա աղոթասեր է, հավատացյալ, հոգեւոր եւ հանկարծ խոսում է վրեժխնդրությունից, այն էլ սարսափելի հետագծով՝ երեխաներ, թոռներ...Րաֆֆին, փաստորեն, զգուշացրեց, որ եթե փորձես մնալ եւ շարունակես այս իշխանությունը, ապագադ վատ է լինելու։ Րաֆֆի Հովհաննիսյանի հնչեցրած միտքը լուրջ մտորումների տեղիք պետք է տա։ -Երկրորդ նախագահի մասին էլ էին նման հայտարարություններ անում, սակայն նրան դեռ բան չի պատահել։ -Ես նման բան չեմ հիշում, որ Քոչարյանի հասցեին նման մեղադրանքներ հնչեցնեին։ Քոչարյանը նախ քաղաքական մենիշխանություն չուներ, չուներ կուսակցություն, որի զգալի հատվածը զբաղված լիներ թալանով, Քոչարյանի եղբոր մասին նման բաներ չեն խոսում, ինչ խոսում են Սերժ Սարգսյանի եղբայրների մասին, նույնիսկ ԱՄՆ-ում Ալեքսանդր Սարգսյանի ապարանքի դիմաց ցույցեր են կազմակերպվում։ Մարդիկ մոտավոր հաշվարկներ ունեն, թե ով ինչի տեր է դարձել։ -Իսկ ով կխանգարի Սերժ Սարգսյանի հետագա սերունդներին, ով է սպառնացողը։ -Ես չեմ կարող մեկնաբանել, թե ովքեր կլինեն, բայց Րաֆֆի ասածների մեջ լուրջ մտածելու բան կա։ Ես Րաֆֆին ճանաչում եմ որպես բարեպաշտ, կիրթ անձնավորություն եւ այս մտքերը, երբ ծագում են նման մարդու գլխում, արդեն մտածելու տեղիք են տալիս։ -Իսկ հնարավոր է, որ դա բոլորովին այլ տեղից ուղարկվող մեսիջ էր, որ հնչեց Հովհաննիսյանի շուրթերից։ -Ես չեմ կարող ասել՝ ինչ մեսիջ էր, բայցեւայնպես մեսիջ էր ուղղված մնացած բոլոր թալանչիներին, որ ոչինչ այսպես չի անցնի։ -Այսինքն, Րֆֆի Հովհաննիսյանի հայտարարությունը օլիգարխների՞ն, միլիարդատերերին էլ է վերաբերում։ -Գիտեք, մտածում եմ, որ Րաֆֆի մտորումները չեն սահմանափակվում Սերժ Սարգսյանով։ -Ինչու եք այդպես կարծում։ -Այս ամենը կարող է կյանքի կոչվել, երբ Հայաստանում իշխանափոխությունը թավշյա չլինի։ Րաֆֆին սա էր ակնարկում, որ կարելի է մի քանի ամիս էլ ավել մնալ իշխանության, բայց շատ ու շատ բաներ կորցնել։ Իսկ տանուլ կտան բոլորը, ովքեր շքախմբի անդամներ են։ Անի Սահակյան
Հետևեք մեզ Viber-ում
