Դահիճ Ադրբեջանն իր զոհերին՝ հայերին է մեղադրում․ ՄԱԿ-ում իրավաբան (video)

Լեռնային Ղարաբաղից փախստականները էթնիկ զտումների զոհ են. Ադրբեջանն ուզի, թե չուզի՝ դա այլ կերպ անվանել հնարավոր չէ։ Այս մասին այսօր՝ հոկտեմբերի 12-ին, հայտարարել է Արդարադատության միջազգային դատարանում Ադրբեջանի դեմ Հայաստանի բողոքի քննության ժամանակ Հայաստանը ներկայացնող պրոֆեսոր Պիեռ դ’Արգենը։

Նրա խոսքով, հայերի կամավոր հեռանալու մասին Ադրբեջանի հեքիաթները պարզապես ծիծաղելի են, և դա գիտակցում է նույնիսկ նախագահ Իլհամ Ալիևը։ «Այսօր մենք, հավանաբար, նորից կլսենք մի հեքիաթ, որտեղ դահիճը զոհին մեղադրում է իր տառապանքների համար։ Ադրբեջանն ամեն ինչ անում է իրավիճակը վատթարացնելու և էթնիկ զտումների համար: Ագրեսիայի հաջորդ օրը Ալիևն ասաց, որ Ադրբեջանը վերականգնել է իր տարածքային ամբողջականությունը։ Միաժամանակ հայ բնակչությունը լքում էր տարածաշրջանը, և Ալիևը շուտով հայտարարեց «մեծ վերադարձի» ծրագրի մասին։ Սա ռասիստական ​​ծրագիր է, որը ներառում է հայերին ադրբեջանցիներով փոխարինելը»,-ասաց դ’Արգենը։