Զեկույցները բավականին «շաբլոն» էին. Իսկանդարյանը՝ «Հայաստան-Սփյուռք» համաժողովի մասին

Կովկասի ինստիտուտի տնօրեն, քաղաքագետ Ալեքսանդր Իսկանդարյանը Լեռնային Ղարաբաղի հակամարտության շուրջ ստեղծված իրավիճակում դեռևս որևէ լուրջ փոփոխություն չի ակնկալում: «Թեպետ սահմանային լարվածությունը նվազել է՝ համեմատած նախորդ տարվա, այնուամենայնիվ այն կա, և դժվար է ասել՝ արդյոք նոր ռազմական գործողություններ չեն լինի:Ղարաբաղյան հակամարտությունն այն փուլում չէ, որ կարելի է ակնկալել որևէ լուրջ շարժ: Գիտենք, որ Մինսկի խումբը զբաղվում է ոչ թե հակամարտության լուծմամբ, այլ սահմանին բռնությունների զսպմամբ: Եվ մոնիտորինգների, հետաքննական, վերահսկման մեխանիզմների մասին խոսակցությունները միտված են հենց բռնությունների զսպմանը, ոչ թե հակամարտության կարգավորմանը»,-ասաց  նա: Խոսելով բանակցությունների ընթացքից՝  քաղաքագետը նշեց, որ այն պետք է պահպանել, քանի որ այդպես է անհրաժեշտ: Հայաստանի և Ադրբեջանի նախագահների միջև վաղ թե ուշ հանդիպում տեղի կունենա, բայց այն նկատելի արդյունքի չի հանգեցնի, ասաց նա և հավելեց, որ ԵԱՀԿ ՄԽ-ն հակամարտության կարգավորմամբ վաղուց չի զբաղվում, զբաղվում է միայն սահմանին բռնությունների զսպումով: Քաղաքագետը համաձայն է Թուրքիայի մեջլիսի հայազգի պատգամավոր Կարո Փայլանի այն գաղափարին, որ հայ-թուրքական նոր արձանագրություններ են անհրաժեշտ հարցին,  պատասխանեց, որ Փայլանն այն գործիչը չէ, ով կարող է հայ-թուրքական փաստաթղթերի հարցերով որոշումներ կայացնել: «Նա Թուրքիայի խորհրդարանի սովորական պատգամավոր չէ, այլ հայ և այն էլ ընդդիմադիր»,- նշեց Ալեքսանդր Իսկանդարյանը: Անդրադարձավ նաև «Հայաստան-Սփյուռք» համաժողովին. «Ես չեմ կարող ասել, որ  հանդիպման նպատակն իրականացավ, քանի որ ոչ մի լուրջ նպատակ դրված չէր:Անգամ կուլուարներում քննարկումներն իրենցից նորություն չէին ներկայացնում:  Թվերի մասին չեմ կարող խոսել, բայց, կարծեմ, այս անգամ մասնակիցների թիվը մեծ էր: Բայց, ամեն դեպքում, թիվը լուրջ ազդեցություն չի ունեցել համաժողովի վրա»,- նշեց նա՝ նկատելով, որ պաշտոնյաների կողմից ներկայացված զեկույցներն էլ բավականին «շաբլոն» էին: