Սկանդալային գրառման պատճառով «Միսս Թուրքիա 2017»-ը զրկվել է տիտղոսից

«Միսս Թուրքիա» գեղեցկության մրցույթի 2017 թ.-ի հաղթող Ըտըր Էսենը տիտղոսից զրկվել է դաշտանի մասին թվիթերյան գրառման պատճառով: Այս մասին հայտնում է «Lenta.ru»-ն: Գեղեցկության մրցույթի կազմկոմիտեի ղեկավար Ջան Սանդիկչիօղլուի խոսքով` աղջիկն այս տարվա հուլիսի սկզբին «կասկածելի գրառում» է հրապարակել Twitter-ի իր էջում։   Էսենը Թուրքիայի հեղաշրջման փորձի մեկ տարվա կապակցությամբ Twitter-ի իր էջում գրառում է կատարել` նշելով, որ դաշտանի օրերը սկսվել են, և իր «արյունն ավելացել է այն հերոսների արյանը», որոնք զոհվել են 2016 թվականի հուլիսի 15-ի անհաջող հեղաշրջման ժամանակ։ Էսենին տիտղոսից զրկել են հաղթանակից ժամեր անց։ Գեղեցկուհու Twitter-ի էջն այժմ չկա, իսկ նրա լուսանկարները ջնջել են գեղեցկության մրցույթի կայքից։   ««Միսս Թուրքիա» մրցույթի կազմակերչական կոմիտեն, որը ձգտում է Թուրքիան աշխարհին ներկայացնել, չի կարող նման հաղորդագրություն ընդունել»,- նշվում է կոմիտեի տարածած հայտարարությունում: Ներկայումս «Միսս Թուրքիա 2017»-ի հաղթող է ճանաչվել Ասլի Սյումենը: