Ադրբեջանը Սիսիանով գազատար է անցկացնում Նախիջևան․ահազանգ

Ֆեյսբուքյան օգտատեր Զարուհի Մուրադյանն իր էջում գրառում էր կատարել և հարցրել, թե ճի՞շտ է արդյոք, որ մի շաբաթով գազը կտրել են, այնուհետև մեկնաբանություններում նա հարց էր ուղղել, թե արդյոք բնակիչները տեղյա՞կ են, որ Սյունքիով Ադրբեջանը գազատար է անցկացնում դեպի Նախիջևան։

Սիսիանի բնակիչ Կարինկա Հարությունյանն արձագանքել է գրառմանը՝ հաստատելով, որ արդեն 3 օր է գազ չունեն։ Օգտատեր Վարդան Բալայանն էլ նշել է, որ գազն անջատել են 15.08-ից մինչև 20.08-ը. «Մայրուղային գազատարի միացման աշխատանքների հետ կապված, ըստ տեղեկությունների՝ Ձեր վկայակոչած պատճառով»:

Oragir.News-ի հետ զրույցում Սիսիանի բնակիչները հաստատեցին տեղեկությունները՝ նշելով, որ թեպետ իշխանությունները փորձում են թաքցնել, սակայն ահազանգն իրական հիմքեր ունի։

Oragir.News-ը կապ հաստատեց «Գազպրոմ Արմենիա» ընկերության լրատվական բաժին ղեկավար Միքայել Հարությունյանի հետ։ Մեզ հայտնեցին, որ Սիսիանում գազանջատումների մասին տեղեկատվությունը տեղադրված է կայքում՝ պլանային անջատումներ բաժնում։ «Պաշտոնական մեկնաբանությունը, թե ինչով են պայմանավորված անջատումները՝ տեղադրված է կայքում, իսկ այդ տեղեկությունները միանշանակ հերքում եմ»,-ասաց Հարությունյանը։

oragir.news