«Երկրային կյանքի մեղքերի հաշվեկշիռը դրանից չի փոխվում». Նվեր Մնացականյան

Հայաստանի որոշ սրբավայրեր հայտնվել են անելանելի վիճակում։ Պատճառը խաչքարերի, կիսանդրիների, երբեմն նաև արձանների բառի իսկական իմաստով գրոհն է այդ սրբավայրերի վրա։ Առայժմ որևէ մշակութապաշտպան կառույց չի ահազանգել ՝ կանգ առեք։ Չմտածեք, խաչքար տեղադրելը մեղք է. ճիշտ հակառակը, քրիստոնեական պարզ խոստովանություն է, որ մեծամասամբ արվում է աստծո բարեհաճությունը շահելու նպատակով։ Բայց, հավատացեք, շատ տհաճ է, երբ արվեստի այդ վիճելի ստեղծագործությունները որպես կանոն տեղադրվում են այս կամ այն անհատին մեծարելու կամ հիշատակելու փորագրություններով։ Հայկական խաչքարը, այնպիսին, ինչպիսին վկայում է մեր խաչքարերի հազարամյա պատմությունը, երբևէ նման մանր նպատակ չի հետապնդել։ Մեր օրերի խաչքարերը, կրկնում եմ, շատ անընդունելի մշակութաբանական հենքով, այն էլ մեր բազմադարյա տարեգրության մեջ հաստատված պատմական սրբավայրերում, ավելի շատ հիշեցնում են մրցակցային քարե դեկորներ, որ առավելապես կոչված են ընդգծելու որևէ անհատի տրամաչափը, ճիշտ այնպես, ինչպես դա արվում է տնտեսական կամ քաղաքական մենաշնորհների պայքարում։ Չգիտեմ, ինչքանով է տեսանելի աստծուն խաչքարաստեղծ այս փարիսեցիությունը, բայց խաչքարը, կամ որևէ մեծի կիսանդրի պատի քար չէ, որ տեղադրես որտեղ ուզես և երբ ուզես, մանավանդ որ խաբկանք է, թե երկրային կյանքի մեղքերի հաշվեկշիռը դրանից փոխվում է… Այս մասին իր ֆեյսբուքյան էջում գրել է Նվեր Մնացականյանը