Մեղրին փոխանակելու թեզը սկսել են տարածել Լևոն Տեր-Պետրոսյանը, ՀԱԿ ակտիվիստները և հիմա Նիկոլը (video)

«Հայաստան» խմբակցության պատգամավոր, ՀՅԴ անդամ Արթուր Խաչատրյանը ԱԺ-ում ճեպազրույցի ժամանակ ասաց, որ երեկ խորհրդարանում մի քանի ակնհայտ բլեֆ է հնչել՝ կետ առ կետ անդրադառնալով դրանց․

«Առաջինը վերաբերվում էր, այսպես կոչված, տարածքային փոխանակմանը ՝ Մեղրիի, Արցախի հետ․ որևէ աղբյուրի վրա իրենք հղում չեն անում, փոխարենը ես մի քանի աղբյուր կնշեմ։ Մասնավորապես, Միջազգային ճգնաժամային խումբը 2005 թվականի հոկտեմբերի 15-ին արված զեկույցի մեջ Քի Վեսթյան բանակցությունների մասին հստակ տվյալներ է տալիս, համաձայն որի՝ Հայաստանն իր ինքնիշխանությունն է հաստատում Լեռնային Ղարաբաղի և Լաչինի միջանցքի նկատմամբ, փոխարենը Ադրբեջանին տրամադրելով ընդամենը ճանապարհ, սուվերեն ճանապարհ։ Եվ շատ հետաքրքիր բան են ասում՝ տարածքային փոխանակման գաղափարը իրենց ներկայացրել են ադրբեջանցիները, իբր այդ համաձայնությունը ձեռք է բերվել Սադարակում 1999 թվականին, բայց իրենք բառացի գրում են, որ ադրբեջանցիները որեւէ հիմնավորող փաստաթուղթ չեն ասում։ Այդ թեզը Հայաստանում սկսել են տարածել Լևոն Տեր-Պետրոսյանը, ՀԱԿ ակտիվիստները և հիմա Նիկոլ Փաշինյանը»,- ասաց Արթուր Խաչատրյանը։ Նա այլ փաստեր ու այլ միջազգային գործիչների հայտարարություններ էլ մեջբերեց։

Անդրադառնալով սեփականաշնորհված ձեռնարկությունների մասին ՔՊ-ականների հայտարարություններին՝ Արթուր Խաչատրյանն ասաց․ «Այդ ձեռնարկությունները, որոնք սեփականաշնորհվում էին, թալանվել էին 1990-ականների սկզբներին»։