Ալիևի 3 պահանջը` Փաշինյանին
Ադրբեջանն ու Հայաստանը խաղաղության շեմին են, ասել է Ադրբեջանի արտգործնախարար Ջեյհուն Բայրամովը՝ ելույթ ունենալով Եվրոպայում անվտանգության և համագործակցության կազմակերպության մշտական խորհրդի արտահերթ նիստում: Նա վստահեցրել է, որ Ադրբեջանը ակտիվորեն աշխատում է Հայաստանի հետ կայուն խաղաղություն ապահովելու համար։
Նրա խոսքով՝ վերջին մի քանի շաբաթների ընթացքում Վաշինգտոնում, Բրյուսելում, Մոսկվայում և Քիշնևում կայացած բանակցությունները «հնարավորություն են տվել ավելի լավ հասկանալ կողմերի դիրքորոշումները»։
Պարզվում է, Բաքուն սպասում է, որ Երևանը քաղաքական կամք դրսևորի՝ լուծելու տարաձայնությունները երեք ուղղություններով, որոնք ձևավորում են խաղաղության պայմանագրի շուրջ երկկողմ քննարկումների օրակարգը...
Բայրամովը նշել է, որ երկու երկրների միջև հարաբերությունների կարգավորման բանակցություններում հիմնական խոչընդոտներն են «Ադրբեջանի ինքնիշխան տարածքներում Հայաստանի անօրինական ռազմական ներկայության շարունակումը», «Ադրբեջանի ներքին գործերին Երևանի միջամտությունը», «Բաքվի և Ղարաբաղի տարածաշրջանի տեղի հայ բնակչության միջև երկխոսության խոչընդոտումը»։
Խաղաղությանը մոտ են, բայց Բաքուն ներկայացնում է պահանջներ, որոնք փաստացի Երևանին վերջնականապես դրդում են հրաժարվել Արցախից: Ու այստեղ կասկած չկա, որ Փաշինյանի իշխանությունը կենթարկվի ճնշումներին
Բայրամովը երեկ Վիեննայում ԵԱՀԿ անդամ պետությունների մշտական ներկայացուցիչների հետ քննարկել է հայ-ադրբեջանական հարաբերությունների կարգավորման գործընթացը, այս մասին հայտնում է Ադրբեջանի դիվանագիտական գերատեսչությունը։ «Ադրբեջանի արտաքին գործերի նախարար Բայրամով Ջեյհունը մասնակցել է Հյուսիսային Մակեդոնիայի նախագահության կողմից կազմակերպված ԵԱՀԿ-ի մասնակից պետությունների մշտական ներկայացուցիչների «կլոր սեղանին»։ Բեղմնավոր քննարկումներ են ծավալվել ԵԱՀԿ-ի համագործակցության օրակարգի և հետկոնֆլիկտային շրջանում ադրբեջանա-հայկական հարաբերությունների շուրջ», - ասվում է հաղորդագրությունում։ Այլ մանրամասներ չի հաղորդվում։
Հիշեցնենք, հունիսի 12-ին Վաշինգտոնում կմեկնարկի Հայաստանի և Ադրբեջանի արտգործնախարարների հերթական հանդիպումը։ Պաշտոնական Երևանն առայժմ չի հստակեցնում, թե քանի օր կտևեն Միրզոյան-Բայրամով բանակցություններն այս անգամ։ ԱՄՆ պետդեպարտամենտի փոխխոսնակն արդեն հայտարարել է՝ «անհամբեր սպասում են» Բաքվի և Երևանի միջև բանակցությունների նոր փուլին։
«Այո՛, մենք անհամբեր սպասում ենք այս ամիս Վաշինգտոնում կայանալիք բանակցությունների հերթական փուլին, քանի որ կողմերը շարունակում են ձգտել Հարավային Կովկասի տարածաշրջանի խաղաղ ապագային: Ինչպես նախկինում եմ ասել, ուղիղ բանակցությունները երկարատև ու արժանապատիվ խաղաղության հասնելու և խնդիրները լուծելու բանալին են։ Միացյալ Նահանգները գոհունակությամբ է արձանագրում, որ Հայաստանն ու Ադրբեջանը այլ ձևաչափերով ևս բանակցում են, այդ թվում՝ նկատի ունեմ ղեկավարների վերջին բանակցությունները», - ասել է նա։
Բայց արդյոք Երևանն ու Բաքուն սկզբունքային հարցերի շուրջ համաձայնության են հասել, խաղաղության համաձայնագրի ստորագրման համար նախադրյալներ կա՞ն...
Որևէ հարցում կա՞ փոխըմբռնում:
Մետաքսյա Շալունց
Հետևեք մեզ Viber-ում
