Տավուշի մարզպետը՝ «անկլավների» մասին (video)
Ինչպես մենք ունենք տարածքներ Ադրբեջանի տիրապետության տակ, նույնն էլ ունեն նրանք՝ եւ՛ Տավուշի մարզում, եւ՛ Հայաստանի տարբեր հատվածներում։ Այս մասին, այսօր՝ հունիսի 6-ին, ԱԺ-ում լրագրողների հետ զրույցում ասաց Տավուշի մարզպետ Հայկ Ղալումյանը:
Անդրադառնալով Տավուշի մարզում այսպես կոչված, «անկլավներին», մարզպետն ասաց. «Մենք բոլորս գիտենք, գաղտնիք չէ, ամեն ինչ թափանցիկ է։ Կոնկրետ այդ մասով ոչինչ այս պահին բանակցություններում տեղի չեն ունենում։ Երբ որ կլինեն, հանրությանը տեղյակ կպահեն։ Ինչպես մենք ունենք տարածքներ Ադրբեջանի տիրապետության տակ, նույնն էլ ունեն նրանք՝ եւ Տավուշի մարզում, եւ Հայաստանի տարբեր հատվածներում։ Այդ հարցը լուծվել է, վարչապետը բազմիցս շեշտել է, բացատրել է, որ հարցը լուծվելու է սահմանազատման, սահմանագծման ընթացքում»,- ասաց Հայկ Ղալումյանը։
Նա նշեց, որ չի կարող ասել կոնկրետ գյուղերի անուններ, նաեւ ինչքան տարածք է, միայն ասաց, որ Բերքաբերի հատվածը մոտ 950 հեկտար գտնվում է Ադրբեջանի տիրապետության տակ։
Մարզպետն ասաց, որ անկլավները միշտ են եղել, ոչ թե առաջացել են հեղափոխությունից հետո։
«Ինչպիսի խնդիրներ ունենք մենք, նույնն ունեն ադրբեջանցիները, պետք է նստել սեղանի շուրջ, որոշվի այդ հարցերը, դեռ կոնկրետ քննարկում չկա», - նշեց Հայկ Ղալումյանը։
Հետևեք մեզ Viber-ում
