Ինչ պայմաններում է պահվում զոհվածի կալանավորված մայրը (video)
Ես փորձել եմ իմ ունեցած գործիքակազմի շրջանակներում ճիշտ հաղորդակցում վարել պետական իրավասու մարմինների հետ այս գործի հետ կապված: Այս մասին, այսօր՝ մայիսի 25-ին, կառավարության նիստից հետո լրագրողների հետ զրույցում ասաց Հայաստանի ՄԻՊ Անահիտ Մանասյանը՝ անդրադառնալով Աշոտ Փաշինյանի բողոքի հիման վրա զոհված զինծառայողի մայր Գայանե Մարտիրոսյանի կալանավորմանը:
«Կոնկրետ դատախազությանը ներկայացրել եմ անձանց մտահոգությունները, դրանց իրավական ձևակերպում ենք տվել: Իրավասու մարմիններին ուղարկվել է այդ ամենը, որպեսզի իրենց իրավասությունների շրջանակներում հաշվի առնվեն այդ հանգամանքները: Ավելին միջամտության հնարավորություն ես` ինքս, որպես ՄԻՊ, այս փուլում չունեմ»,-ասաց նա:
Դիտարկմանը, որ գլխավոր դատախազի հետ ինքը մտերիմ է, կարող էր հորդորել փոխել Գայանե Մարտիրոսյանի կալանքը, Մանասյանն արձագանքեց. «Ես թե՛ իրավական, թե՛ մարդկային բոլոր հանգամանքները հաշվի առնելով՝ փորձել եմ գործի դնել բոլոր հնարավոր գործիքակազմերը, որոնք այս գործի շրջանակներում հնարավոր են: Իմ հնարավորությունների շրջանակը հետեւյալն է՝ արձանագրել, որ կալանքը կարող է բացառիկ դեպքերում կիրառվել, խնդրել, որպեսզի այս հանգամանքը մի անգամ էլ հաշվի առնվի հետագա բողոքարկման եւ այլ գործընթացների շրջանակներում, նաեւ խնդրել իրավասու մարմիններին հնարավորինս տեղեկատվություն փոխանցել, քանի որ այս գործը երկու բաղադրիչ ունի՝ իրավական եւ մարդկային: Ես դա արել եմ, որը ակնհայտ է մեր հաղորդագրությունից:
Կալանքի հարցին ես չեմ կարող ավելի խորը անդրադառնալ, որովհետեւ օրենքով հստակ արգելք ունեմ դատարանների գործունեությանը միջամտելու առնչությամբ: Դրա համար իմ հիմնական հաղորդագրությունն այն է եղել, որ այն չափանիշները, որոնք կալանքի համար են անհրաժեշտ, պետք է խստորեն պահպանվեն ամբողջ գործընթացի շրջանակներում: Եվ երկրորդ կարեւոր հանգամանքը, որը շատ ավելի մեծ առումով նկատելի է, անընդհատ հանրային, քաղաքական գործիչների կողմից տարածվում է ատելության խոսք այս համատեքստում, որն անընդունելի է: հետեւաբար, հանրային բեւեռացումը պետք է փորձ անեն ընդհանրապես բացառել նշված գործիչները, նաեւ պետք է փորձ անեն հակազդել այդ ատելության խոսքին:
Ես ինքս էլ անընհատ շփվում եմ գտնվելու վայրն անհայտ, նաեւ զոհված զինծառայողների հարազատների հետ եւ շատ կարեւոր է, որ պետությունը ունենա հստակ ծրագրեր նրանց աջակցության ահամար, ոչ միայն նյութական, այլեւ հոգեբանական աջակցություն ցույց տալու համար»,- ասաց Անահիտ Մանասյանը:
Հետևեք մեզ Viber-ում
