Պայթյունը մոտ է

Գնալով ավելի ու ավելի է խորանում ռուս-ամերիկյան դիվանագիտական ճգնաժամը` ստանալով, իրապես, սկանդալային նորանոր դրսևորումներ... Օրեր առաջ Վաշինգտոնում ՌԴ առևտրային ներկայացուցչությունում խուզարկություններ են անցկացվել, իսկ ավելի ուշ ռուս դիվանագետներն ազատել են Սան Ֆրանցիսկոյում ՌԴ գլխավոր հյուպատոսության տարածքը, ինչպես նաև Նյու Յորքում ՌԴ առևտրային ներկայացուցչության մասնաշենքը: Մոսկվան պահանջում է անհապաղ վերադարձնել ամերիկյան իշխանությունների պահանջով փակված հյուպատոսարանի և առևտրային ներկայացուցչությունների շենքերը: Միացյալ Նահանգները դրանք առգրավել է՝ ի պատասխան Ռուսաստանում ամերիկացի դիվանագետների թիվը կրճատելու Մոսկվայի պահանջի: Ռուսաստանի պատվիրակության կազմում Չինաստան՝ ԲՐԻԿՍ-ի գագաթնաժողովին մեկնած փոխարտգործնախարար Սերգեյ Ռյաբկովը Սիանմենում անդրադարձել է ռուս-ամերիկյան վեճին և «պետական խուլիգանություն» է անվանել մոսկվային պատկանող դիվանագիտական կառույցների գրավումը: «Մեր օբյեկտները՝ Սան Ֆրանցիսկոյում գլխավոր հյուպատոսարանը, Վաշինգթոնում առևտրային ներկայացուցչությունը և Նյու Յորքում դրա մասնաճյուղը խուզարկության ենթարկելը խայտառակություն էր: Ամերիկացիները պնդում են, թե դա զննություն էր, բայց ոչ, դա խուզարկություն էր», - ասել է Ռյաբկովը: Նրա խոսքով, որոշ երկրներ տարիներ առաջ մեղադրվել են պետական մակարդակով ահաբեկիչներին հովանավորելու համար: «Ես այս իրադարձությունները կանվանեմ «պետական խուլիգանություն», - հայտարարել է փոխարտգործնախարարը: Մոսկվան ռուսաստանյան դիվանագիտական օբյեկտները փակելու և այնտեղ զննություն անցկացնելու ամերիկացիների որոշումը համարում է «բացահայտ թշնամական արարք» և սպառնում կոշտ պատասխանով: «Մենք չենք շտապելու, բայց, անպայման, կպատասխանենք, քանի որ հարկ է վերլուծել ստեղծված իրավիճակը: Դյուրին չէ միանգամից արձագանքել, երբ գործ ունես խուլիգանների հետ, սակայն արձագանք կլինի», - ասել է Ռյաբկովը: Ռուսները հիմա ամերիկացիների գործողությունները «ռեյդերային գրավում» են անվանում: Այդ եզրը անցած շաբաթ օրը շրջանառության մեջ է դրել Միացյալ Նահանգներում Ռուսաստանի առևտրային ներկայացուցիչ Ալեքսանդր Ստադնիկը․ - «Եթե համառոտ ասեմ, ապա մենք միջազգային հարաբերությունների համակարգում վանդալիզմի աղաղակող օրինակի՝ արտասահմանում Ռուսաստանի գույքի ռեյդերային գրավման ականատեսն ենք»: Նույն միտքը կրկնել է Ռուսաստանի արտգործնախարարության մամլո ծառայության ղեկավար Մարիա Զախարովան, ով «Ռոսիա 1» հեռուստակայանի «Կիրակնօրյա երեկո Վլադիմիր Սոլովյովի հետ» ծրագրի եթերում խստորեն դատապարտել է ամերիկացիների գործողությունները՝ հայտարարելով․ - «Դա բացարձակ ռեյդերային գրավում է: Խոսքը Ռուսաստանի Դաշնության սեփականության մասին է: Այն ձեռք է բերվել ոչ թե այսօր կամ երեկ, այլ շատ վաղուց: Ինչո՞ւ ռեյդերային գրավում: Ես հիմա մի սենսացիոն բան կասեմ՝ մեզ պետդեպարտամենտի խողովակով ոչ թե ակնարկել, այլ ուղիղ ասել են, որ ակնկալում են, որ մենք այդ օբյեկտները կվաճառենք ամերիկյան պետությանը»: Զախարովայի համոզմամբ, այդ ամբողջ պատմությունն ամերիկյան կողմի համար անհրաժեշտ էր ապացուցելու համար ռուսների միջամտությունն ԱՄՆ-ի ներքին գործերին և մասնավորապես՝ նախագահական ընտրություններին: Սեպտեմբերի 2-ը «սև օր» էր ամերիկյան դիվանագիտության համար: Ինչպես հայտնում է «Կոմսոմոլսկայա Պրավդան», ասել է Մարիա Զախարովան: «Դա միանշանակ սև օր էր ամերիկյան դիվանագիտության և ամերիկյան հատուկ ծառայությունների աշխատանքի պատմության մեջ: Այդպես հարվածի տակ դնել սեփական հատուկ ծառայություններին, գիտեք, դա, իհարկե, մեծագույն ձախողում է», - հայտարարել է Զախարովան Россия 1 հեռուստաալիքի եթերում: Ամերիկյան կողմը պնդում է, որ ձեռնարկել է միանգամայն օրինական միջոցներ՝ ռուսներից պահանջելով մինչև սեպտեմբերի 2-ն ազատել Սան Ֆրանցիսկոյում գլխավոր հյուպատոսարանի շենքը և վաշինգթոնյան ու նյույորքյան առևտրային ներկայացուցչությունները: Պետական դեպարտամենտը հայտնել է, որ այդ օբյեկտներում զննությունը կատարվել է ռուսաստանցի պաշտոնյաների ներկայությամբ: Այդ քայլին Վաշինգթոնը դիմել է ի պատասխան Ռուսաստանում ամերիկացի դիվանագետների կորպուսից 755 աշխատողների հայրենիք վերադարձնելու Մոսկվայի պահանջին: Չնայած սրված հարաբերություններին` Պետդեպի պաշտոնական ներկայացուցիչ Հիզեր Նոյերթը «ցավալի» է անվանել Մոսկվայի որոշումը՝ կրճատելու Ռուսաստանում ամերիկյան դիվանագիտական առաքելության աշխատակիցների թիվը։ Նա նաև նշել է, որ Սան Ֆրանցիսկոյում ռուսական գլխավոր հյուպատոսության փակմամբ հավասարվել է երկու երկրների դիվանագիտական օբյեկտների թիվը։ Նոյերթն ընդգծել է, որ չնայած դրան, ԱՄՆ-ը չի արտաքսում ռուս դիվանագետներին հյուպատոսության փակումից հետո։ «Մենք հույս ունենք, որ կկարողանանք վերադառնալ իրավիճակի, երբ մեզ կհաջողվի աշխատել Ռուսաստանի հետ ընդհանուր հարցերի վրա»,-հավելել է Պետդեպի ներկայացուցիչը։ Մետաքսյա Շալունց