Նիկոլի սև ագռավի խաղաղությունը (video)
Միջազգային իրադրությունն ուղիղ ազդեցություն ունի մեր տարածաշրջանում ռազմավարական իրադրության գնահատականի վրա, Ազգային ժողովում հայտարարեց վարչապետ Նիկոլ Փաշինյանը:
«Պետք է նաև ասենք, որ մեր տարածաշրջանում տեղի ունեցող իրադարձությունները որոշակի ազդեցություն են ունենում միջազգային իրադրության հետագա զարգացման վրա», - ասաց նա:
Վարչապետի խոսքով՝ մեր տարածաշրջանում անվտանգության ու կայունության համակարգերը դեֆորմացված են, ինչը, նրա խոսքով, նշանակում է, որ առերեսվում ենք լրացուցիչ անվտանգային մարտահրավերների:
«Այսինքն՝ այն համակարգը, որ ի սկզբանե պետք է ապահովեր անվտանգությունն ու կայունությունը մեր տարածաշրջանում, ակնհայտորեն չի գործում բավարար արդյունավետությամբ», - ընդգծեց նա:
Նիկոլ Փաշինյանը հայտարարեց, թե համապարփակ խաղաղությունը կարող է ապահովել կամ երաշխավորել ՀՀ անվտանգությունը:
«Եթե ապահովողն ինչ-որ մեկն է, նշանակում է, որ անվտանգային սպառնալիքը մեծ է, խորքային ռազմավարական առումով անվտանգություն կարող է ապահովել խաղաղությունը», - նշեց նա:
Վարչապետը իրատեսական է համարում խաղաղությունը, բայց պետք է հնարավոր լինի ավելի դետալացված արձանագրել՝ ինչպես է հնարավոր խաղաղությունը:
«Պրոբլեմն այն է, որ այստեղ կա երկու կոմպոնենտ՝ քաղաքական կամք ու խաղաղության հասնելու պարամետրերի մանրամասները: Ակնհայտ է, որ մենք խաղաղության հասնելու քաղաքական կամք ունենք, խնդիրը հետևյալն է, թե ինչքանով մեզ կհաջողվի բանակցային գործընթացի արդյունքում ձևավորել խաղաղության այնպիսի պարամետրեր, որոնք կարող են ընդունելի լնել Հայաստանի կամ հայ ժողովրդի համար: Այո՛, կա տարբերակ, որ խաղաղությունը իրատեսորեն հնարավոր լինի այն պարամետրով, որոնք սկզբունքորեն ընդունելի են Հայաստանի ու հայ ժողովրդի համար, կարող են լինել պարամետրեր, որ խաղաղությունը իրատեսորեն հնարավոր է այն պարամետրերով, որոնք սկզբունքորեն ընդունելի չեն Հայաստանի ու հայ ժողովրդի համար: Հետևաբար, մեր խնդիրն է կարողանալ իրատեսությունը, ընդունելիությունը և հարցի հետ կապված էմոցիաները հնարավորինս բալանասավորել ու մոտեցնել իրար, ինչքանով դա հնարավոր կլինի՝ չեմ կարող ասել, բայց որ ամեն ինչ կանենք, որ դա տեղի ունենա՝ միանշանակ կարող եմ ասել», - ընդգծեց Նիկոլ Փաշինյանը:
Վարչապետն ասաց, թե մենք քայլում ենք ականապատ դաշտի միջով:
«Ինչքան քայլում ենք այն ականապատ դաշտի միջով, այնքան ականներն ավելի խտանում են. սա մեզանից պահանջում է լրացուցիչ ջանքեր ու ճկունություն», - հավելեց վարչապետը:
Հետևեք մեզ Viber-ում
