«Հանգիստ եղեք»..., «Դուք մուտք եք գործում Ադրբեջանի Հանրապետության տարածք»
Ապրիլի 23-ից Արցախում ռուսական խաղաղապահ զորախումբը բանակցություններ է անցկացնում ադրբեջանական կողմի հետ: Արդյունքների մասին հայտնի է միայն այսքանը. երեկոյան Արցախի տեղեկատվական շտաբից հայտնեցին, որ Արցախի կառավարության և ՌԴ խաղաղապահ զորակազմի ջանքերի արդյունքում հաջողվել է որոշակիորեն վերականգնել վերջին օրերին՝ Արցախ-Հայաստան սահմանագծին ադրբեջանական ապօրինի անցակետի տեղադրման պատճառով խափանված հումանիտար բեռների ներկրումը Հայաստանի Հանրապետությունից:
Մինչ Արցախում բանակցությունները շարունակվում են` երեկ ռուսական աղբյուրները հաղորդում էին, թե ռուսական կողմը պատրաստվում է պաշտոնանկ անել խաղաղապահ առաքելության ղեկավար, գեներալ Վոլկովին: Արցախում Ռուսական խաղաղապահ զորախմբի նոր հրամանատար է նշանակվում գեներալ-գնդապետ Ալեքսանդր Լենցովը, «Sputnik Արմենիա»-ին հայտնել են ՌԴ ՊՆ-ի աղբյուրները, սակայն պաշտոնական աղբյուրները լուրերը առայժմ չեն հաստատել:
Հատկանշական է, որ Արցախում բանակցությունները եռակողմ չեն, առանձին-առանձին են քննարկումներ գնում, այսինքն, ընդհատվել են Ստեփանակերտ-Բաքու-ՌԴ խաղաղապահ զորախումբ շփումները:
Իրականում ի՞նչ է տեղի ունենում...
Առանց փաստաթուղթ ստորագրելու Հայաստանի և Ադրբեջանի միջև տեղի է ունենում սահմանազատում, և Բաքուն Հակարիի կամրջի վրա անցակետ դնելով գծում է իր սահմանը։ Իսկ արդյունքում 120 հազար արցախցիներ թողնում են մեն-մենակ թուրք-ադրբեջանական տանդեմի առաջ:
Նկատենք, որ պաշտոնական Երևանը խստորեն դատապարտել էր Ադրբեջանի կողմից Լաչինի միջանցքում ապօրինի անցակետ տեղադրելու քայլը։ Ի պատասխան, Բաքուն հակադարձել էր՝ Լաչինում անցակետի տեղադրումը միանգամայն օրինական է, համապատասխանում է միջազգային իրավունքի բոլոր նորմերին, առավել ևս, որ Պրահայում և Սոչիում կայացած հանդիպումների ընթացքում Հայաստանն ինքն է ճանաչել Ադրբեջանի տարածքային ամբողջականությունը։
«Հանգիստ եղեք, բոլոր փակ ճանապարհները մի օր բացվում են և բաց ճանապարհները, երբ որ չկա հասկացվածություն, մի օր էլ փակվում են», - երեկ հասարակությանը «հանգստացրել» է ԱԺ-ի Պաշտպանության հանձնաժողովի նախագահ Անդրանիկ Քոչարյանը: Սակայն իրականում Փաշինյանի իշխանությունն ամեն ինչ հասցնում է իր «տրամաբանական ավարտին»:
Ինչո՞վ է այս ամենն ավարտվելու...
Որևէ արցախցի չի ցանկանում անցնել Ադրբեջանի անցակետով: Սակայն իրականությունը սա է. «Ուշադրություն, Դուք մուտք եք գործում Ադրբեջանի Հանրապետության տարածք». արցախցիներին երեկվանից արդեն եռալեզու այս ցուցանակն է «ողջունում», որը տեղադրվել Հակարիի կամրջի վրա։ Ադրբեջանական կողմը կայծակնային արագությամբ ավարտին է հասցնում ապրիլի 23-ից տեղադրված անցակետի ձևավորումը:
Իսկ Փաշինյանի իշխանությունը խորհուրդ է տալիս` «հանգիստ» մնալ:
Մետաքսյա Շալունց
Հետևեք մեզ Viber-ում
